හිටපු අමාත්‍ය හරීන් ප්‍රනාන්දු මහතා කොළඹ අපරාධ පරීක්ෂණ දෙපාර්තමේන්තුව වෙත කැඳවා තිබෙනවා.
එම කැඳවීමට ප්‍රතිචාර වශයෙන් අද (22) පෙරවරු 10ට පමණ හිටපු අමාත්‍යවරයා අපරාධ පරීක්ෂණ දෙපාර්තමේන්තුව වෙත පැමිණ ඇති බවයි දසත ප්‍රාදේශීය වාර්තාකරු පැවසුවේ.
තමන්ව අපරාධ පරීක්ෂණ දෙපාර්තමේන්තුවට කැඳවීමේ නිශ්චිත හේතුවක් දන්වා නොමැති වුව ද, බොහෝ විට පසුගියදා ආන්දෝලනයකට තුඩු දුන් බාල ඖෂධ මෙරටට ගෙන්වීමේ ක්‍රියාපටිපාටියේ දී ඊට කැබිනට් මණ්ඩල අමාත්‍යවරු වශයෙන් අනුමැතිය ලබාදීමේ සිදුවීම සම්බන්ධයෙන් වන විමර්ශනයට අවශ්‍ය ප්‍රකාශ ලබා ගැනීම සඳහා කැඳවන්නට ඇතැයි සිතන බව ද හිටපු අමාත්‍ය හරීන් ප්‍රනාන්දු මහතා සඳහන් කළා.
පසුගියදා හිටපු අමාත්‍යවරයා ව බදුල්ල පොලිසියෙන් අත් අඩංගුවට ගෙන බදුල්ල මහේස්ත්‍රාත් අධිකරණයට ද ඉදිරිපත් කෙරුණේ; මැතිවරණ කාල සීමාවේ දී මැතිවරණ නීති උල්ලංඝනය කරමින් පොදු ස්ථානයක කලහකාරී අයුරින් හැසිරීමට එරෙහිවයි.
කෙසේවෙතත් හිටපු අමාත්‍යවරයාව එදින ම මහේස්ත්‍රාත් අධිකරණයෙන් ඇප මත මුදා හැරුණා.
මෙවර හරීන් ප්‍රනාන්දු මහතා ගෑස් සිලින්ඩරයෙන් බදුල්ල දිස්ත්‍රික්කයෙන් මහමැතිවරණයට ඉදිරිපත් වුණ ද ඔහු පරාජයට පත් වුණේ වසර 04ක කාලයකට පාර්ලිමේන්තුවේ දොරටුව වසා ගනිමින්.
