මහ දවාලේ සිදු කළ කෝටි ගණනේ මුදල් මංකොල්ලයට සම්බන්ධ සැකකරු අල්ලයි

මිනුවන්ගොඩ දී සිදු වූ රුපියල් කෝටි 07කට අධික මූල්‍ය මංකොල්ලයට සම්බන්ධ එක් අයෙකු පොලිස් අත්අඩංගුවට ගෙන තිබෙනවා.

තොරතුරු වාර්තා වන පරිදි මෙම සිදුවීම ඊයේ (19) පස්වරුවේ සිදු ව ඇති අතර ගම්පහ කොට්ඨාස අපරාධ විමර්ශන කාර්යාංශය හා ගම්පහ පොලීසිය එක්ව සිදුකළ මෙහෙයුමකින් අනතුරුවයි අදාළ සැකකරු ගම්පහ කඩුවන්ගහ – ප්‍රදේශයේ දී අත්අඩංගුවට ගෙන ඇත්තේ.

ආරක්ෂිතව මුදල් ප්‍රවාහනය කරන පෞද්ගලික ආයතනයක රියදුරෙකු මෙලෙස මිනුවන්ගොඩ දී රුපියල් කෝටි 7කට අධික මුදල් රැගෙන පලා ගොස් තිබෙනවා.

ඔහුව අත්අඩංගුවට ගන්නා අවස්ථාවේ දී ඔහු සතුව තිබී අයිස් මත්ද්‍රව්‍ය ග්‍රෑම් 5යි මිලිග්‍රෑම් 420ක් සොයාගෙන තිබූ අතර සොරකම් කළ මුදලින් රු 31,515,291ක මුදලක් ද සොයාගෙන ඇති බවත් වාර්තාවනවා.

තම්මිට, මාකවිට ප්‍රදේශයේ 35 හැවිරිදි පුද්ගලයෙකුයි මෙලෙස අත්අඩංගුවට ගෙන ඇත්තේ.

ආරක්ෂිතව මුදල් ප්‍රවාහනය කරනු ලබන පෞද්ගලික ආයතනයක සිව්දෙනෙකුගෙන් යුත් නිලධාරීන් කණ්ඩායමක් වෑන් රථයකින් ඊයේ මිනුවන්ගොඩ පිහිටි පෞද්ගලික බැංකුවක් වෙත ගොස් තිබුණේ මුදල් සහිත මළු කිහිපයක් ද රැගෙනයි.

බැංකුව අසලට පැමිණි පසු රියදුරුවරයා පමණක් වෑන් රථයේ සිටියදී සෙසු පිරිස ඉන් බැස ගොස් තිබෙනවා.

ඒ වනවිට වෑන් රථයේ රුපියල් හත් කෝටි දහතුන් ලක්ෂ විසිහත් දහස් දෙසිය අනූහයක මුදලක් තිබී ඇති අතර රියදුරුවරයා අදාළ මුදල ද රැගෙන එම රථයෙන්ම පලා ගොස් තිබෙනවා.

අනතුරුව සැකකරු වෑන් රථය ගම්පහ, උග්ගල්ගොඩ ප්‍රදේශයේ අතහැර දමා තවත් පුද්ගලයෙකු සමග යතුරුපැදියකින් පලාගොස් ඇති අතර සිදු කළ පූර්ණ විමර්ශනවලින් අනතුරුවයි සැකකරුව අත් අඩංගුවට ගැනුණේ.