ගෙවුණු පැය 24 ක කාලය තුළ එනම් ඊයේ (13) පස්වරු 4.30 දක්වා කාලය තුළ මැතිවරණ නීති උල්ලංඝනය කිරීම්, ප්‍රචණ්ඩ ක්‍රියා සහ වෙනත් චෝදනා සම්බන්ධයෙන් ලැබුණු පැමිණිලි සංඛ්‍යාව පිළිබඳ ව මැතිවරණ කොමිෂන් සභාව නිවේදනයක් නිකුත් කර තිබෙනවා.
ඒ අනුව ගෙවුණු කාලය තුළ ජාතික මැතිවරණ පැමිණිලි කළමනාකරණ මධ්‍යස්ථානය වෙත කිසිදු ප්‍රචණ්ඩ ක්‍රියාවක් වාර්තා වී නොමැති බවත් මැතිවරණ නීති උල්ලංඝනය කිරීම් 250ක් වාර්තා වී තිබෙන බවත් එම නිවේදනයේ සඳහන්.
දිස්ත්‍රික් මැතිවරණ පැමිණිලි කළමනාකරණ මධ්‍යස්ථානය වෙත එක් ප්‍රචණ්ඩ ක්‍රියාවක් වාර්තා වී ඇති අතර නීති උල්ලංඝනය කිරීම් 212ක් ඇතුළු මුළු පැමිණිලි 213 ලැබී ඇති බවයි.
ඒ අනුව ගෙවුණු පැය 24ක කාලය තුළ දෛනික මුළු පැමිණිලි සංඛ්‍යාව එක් ප්‍රචණ්ඩ ක්‍රියාවක් සමගින් මුළු පැමිණිලි 463ක් වාර්තා වී තිබෙනවා.
මේ අතර මැතිවරණය ප්‍රකාශයට පත් කළ සැප්තැම්බර් මස 26 වැනි දින සිට නොවැම්බර් මස 13 වැනි දින තෙක් දිවයින පුරා ප්‍රචණ්ඩ ක්‍රියා 23ක්, නීති උල්ලංඝනය කිරීම් 3764ක්, වෙනත් පැමිණිලි 35ක් සමගින් මුළු පැමිණිලි සංඛ්‍යාව 3822ක් ලැබී ඇති බවයි නිවේදනයේ දැක්වෙන්නේ.
එමෙන්ම මැතිවරණය ප්‍රකාශයට පත් කළ දා සිට ලැබුණු පැමිණිලිවලින් ඊයේ (13) දිනය තෙක් ජාතික මැතිවරණ පැමිණිලි කළමනාකරණ මධ්‍යස්ථානය වෙත ලද පැමිණිලි 1206න් 659 විසඳා අවසන් බවත් තවදුරටත් විසඳීමට ලක් කරමින් පැමිණිලි 547ක් පවතින බවත් වාර්තා වනවා.
