කැලණිය විශ්වවිද්‍යාලයේ ශිෂ්‍ය නේවාසිකාගාරයකින් ඇද වැටී සිසුවෙකු ජීවිතක්ෂයට පත් ව තිබෙනවා.
අද (23) අලුයම මෙම සිදුවීම සිදු ව ඇත්තේ විශ්වවිද්‍යාලයේ සී.ඩබ්.ඩබ්.කන්නන්ගර ශාලාවේ දියි.
අදාළ සිසුවා තට්ටු 04කින් පහළට ඇද වැටී ඇති බවත්; පසුව ඔහුව කිරිබත්ගොඩ මූලික රෝහලට ඇතුළත් කළ ද ජීවිතක්ෂයට පත්ව ඇති බවත් පැවසෙනවා.
මෙලෙස මියගොස් ඇත්තේ 24 හැවිරිදි සිව්වැනි වසරේ ඉගෙනුම ලබමින් සිටි ප්‍රින්ස් රාජු බණ්ඩාර නමැති රිදීමාලියද්ද ප්‍රදේශයේ පදිංචිකරුවෙක්.
මෙම සිසුවා සහ තවත් සිසුන් පිරිසක් උපන්දින සාදයක් පවත්වා ඇති බවත්; එහිදී මියගිය සිසුවා අධික ලෙස මත්පැන් පානය කර ඇති බවයි පැවසෙන්නේ.
ඉන් අනතුරුව ඔවුන් සාදය නිමා කර සිය නේවාසිකාගාරය වෙත පැමිණ ඇති බවත්; මත්වීමෙන් පසුව මියගිය සිසුවා සිය කාමරයේ ජනේලය සවිකර ඇති බැම්ම මතට නැග සිටියදී මෙම මරණය සිදු ව ඇති බවයි පොලිසිය සඳහන් කරන්නේ.
මෙය සියදිවි හානිකර ගැනීමක් ද නැතහොත් හදිසි අනතුරක් ද යන්න මේ වනවිට සෙවීමට පරීක්ෂණ පැවැත්වෙනවා.
මියගිය සිසුවා කැලණිය සරසවියේ වාණිජ හා කළමනාකරණ පීඨයේ ගණකාධිකරණ අධ්‍යයන අංශයේ ඉගෙනුම ලබමින් සිටි අයෙකු බවත්; විශ්වවිද්‍යාලය තුළ ද සිද්ධිය සම්බන්ධයෙන් අභ්‍යන්තර පරීක්ෂණයක් සිදු කරන බවටත් විශ්වවිද්‍යාල පාලනාධිකාරිය දැනුම්දී තිබෙනවා.
සිද්ධිය සම්බන්ධයෙන් කැලණිය පොලිස් විමර්ශන ක්‍රියාත්මක වනවා.
