මැතිවරණ වියදම් නියාමනයට අදාළ ගැසට් පත්‍රය නිකුත් වෙයි – හරියට තොරතුරු නොදුන්නොත් දැඩි දඬුවම් (නිවේදනය)

මැතිවරණ කොමිෂන් සභාව විසින් මැතිවරණ වියදම් නියාමනය කිරීමට අදාළව අතිවිශේෂ ගැසට් නිවේදනයක් නිකුත් කර තිබෙනවා.

මෙම නිවේදනය අනුව 2023 අංක 3 දරන මැතිවරණ වියදම් නියාමනය කිරීමේ පනතේ 03 වැනි වගන්තිය යටතේ වූ නියමය ප්‍රකාරව 1981 අංක 01 දරන පාර්ලිමේන්තු මැතිවරණ පනතේ විධිවිධාන ප්‍රකාරව අදාළ ලිඛිත නීතියට අනුකූලව පිහිටුවා ඇති එක් එක් මැතිවරණ කොට්ඨාස සඳහා මන්ත්‍රීවරුන් තෝරා පත් කර ගැනීමට පවත්වන 2024 පාර්ලිමේන්තු මැතිවරණයේ දී ඒ ඒ පිළිගත් දේශපාලන පක්ෂ, ස්වාධීන කණ්ඩායම් හා අපේක්ෂකයින් විසින් 2023 අංක 3 දරන මැතිවරණ වියදම් නියාමනය කිරීමේ පනතේ 03 වැනි වගන්තිය ප්‍රකාරව මැතිවරණ ප්‍රචාරණ කටයුතු වෙනුවෙන් වැය කළ යුතු වියදම් සීමාවන්, තරග කරන පිළිගත් දේශපාලන පක්ෂ හා ස්වාධීන කණ්ඩායම් සමග සාකච්ඡා කිරීමෙන් අනතුරුව කොමිෂන් සභාව විසින් අදාළ ගැසට් නිවේදනය නිකුත් කරනු ලැබුවා.

මේ අතර මහ මැතිවරණය සඳහා ඉදිරිපත් වන අපේක්ෂකයින් සිය වියදම් සහ ආදායම් වාර්තා පවත්වාගෙන යාම සඳහා වෙනම ම පුද්ගලයෙකු පත් කරගැනීමට කටයුතු කිරීම සුදුසු බව පැෆ්රල් සංවිධානය පවසනවා.

එහි විධායක අධ්‍යක්ෂ රෝහණ හෙට්ටිආරච්චි මහතා පැවසුවේ එසේ නොවුණහොත් පසුගිය ජනාධිපතිවරණයේ දී ආදායම් වියදම් වාර්තා ලබාදීමේ දී ඇතැම් අපේක්ෂකයින්ට සිදු වු අපහසුතාවලට මෙම අපේක්ෂකයින්ට ද මුහුණදීමට සිදුවිය හැකි බවයි.

මේ අතර මැතිවරණයේ දී ආදායම් වියදම් වාර්තා නිසි පරිදි ලබා නොදෙන අපේක්ෂකයින්ට මුහුණ පෑමට සිදුවන තත්ත්වයන් පිළිබඳව ප්‍රජාතාන්ත්‍රීය, ප්‍රතිසංස්කරණ හා මැතිවරණ අධ්‍යයන ආයතනයේ විධායක අධ්‍යක්ෂ මංජුල ගජනායක මහතා ද අදහස් පළ කළා.

ඔහු පැවසුවේ; යම් ආකාරයකින් අපේක්ෂකයෙකුට තමන්ගේ වියදම් වාර්තා ලබාදීමට නොහැකි වුවහොත්, නැතිනම් අසත්‍ය තොරතුරු ඇතුළත් කළොත් අධිකරණ ක්‍රියාවලියක් තුළින් දේශපාලන අයිතිය වසර 3කට අහිමි විය හැකි බවත් මැතිවරණ පෙත්සමක් තුළින් ධුරය අහිමි වීමට ද ඉඩක් පවතින බවයි.

මැතිවරණ වියදම් නියාමනය කිරීමට අදාළව නිකුත් කළ සම්පූර්ණ ගැසට් නිවේදනය මෙතැනින් කියවන්න..