පානදුර – හේනමුල්ලේ නීතිවිරෝධී මහා පරිමාණ ගව ඝාතකාගාරයක් පානදුර උතුර පොලිසිය මගින් වටලා තිබෙනවා.
දසත ප්රාදේශීය වාර්තාකරු පැවසුවේ; දැනට දින කිහිපයකට පමණ පෙර පොලිස් අණ නොතකා ධාවනය වූ ගවයින් රැගත් ලොරි රථයකට පානදුර කෙසෙල්වත්ත ප්රදේශයේ දී පොලිසිය මගින් වෙඩි තැබීමක් සිදුකළ අතර, ඉන්පසුව බස්නාහිර පළාත් බුද්ධි නිලධාරීන් විසින් සිදු කරන ලද පරීක්ෂණවලින් හෙළි වූයේ; දුර පළාත්වලින් ගවයින් රැගෙන එන ස්ථානය පිළිබඳව ලද තොරතුරක් මත එම ගව ඝාතකාගාරය සොයා ගැනීමට බුද්ධි අංශ ඊයේ (02) කටයුතු කරනු ලැබූ බවයි.
කිසිදු බලපත්රයක් නොමැතිව හා සෞඛ්ය නීති උල්ලංඝනය කරමින් සිදු කරන මෙම ගව ඝාතකාගාරය පවත්වා ගෙන ගොස් ඇති බවටයි හෙළි ව ඇත්තේ.
එම ස්ථානයේ සිටි ප්රධාන සැකකරු පලා ගොස් ඇති අතර,පොලිසිය එම සැකකරු හඳුනාගෙන අත්අඩංගුවට ගැනීමට කටයුතු කරන බව පානදුර උතුර පොලිසිය ප්රකාශ කළා.
මෙම ගව ඝාතකාගාරයේ තිබී ඉතා අමානුෂික ලෙස ඝාතනය කරන ලද ගවයින් කිහිපදෙනෙකුගේ මස් කිලෝග්රෑම් 200කට ආසන්න ප්රමාණයක් පොලිස් භාරයට ගැනුණා.
එම ඝාතනය සඳහා යොදා ගන්නා තියුණු ආයුධ කිහිපයක් ද පොලිස් භාරයට ගැනුණු අතර, ගවයින් ප්රවාහනය කරන ලද බවට සැක සහිත වලංගු ලියාපදිංචි සහතික ඉක්ම වූ ත්රීරෝද රථයක් ද පොලිසිය විසින් එම ස්ථානයේ තිබී සොයාගනු ලැබුවා.
වැඩිදුරටත් තොරතුරු අනාවරණය වී ඇත්තේ බුත්තල, කතරගම, අවිස්සාවේල්ල ,මතුගම ආදී ප්රදේශ රැසකම අයාලේ යන ගවයින් සහ ගොවිපළවල්වල සිටින ගවයින් සොරකමින් පසු මෙම ස්ථානයට රාත්රී කාලයේ දී රැගෙනවිත් ඝාතනයන් සිදු කරන බවයි.
මෙම ගව ඝාතකාගාරයෙන් ගවයින් සඳහා ඉහළ මිලක් ලැබෙන බවත් එම නිසා ගව සොරකමේ යෙදෙන පුද්ගලයින් මෙම ස්ථානයට විශාල වශයෙන් ගවයින් රැගෙන ඒමට කටයුතු කර ඇති බව ද අනාවරණය වී තිබෙනවා.
සිද්ධිය සම්බන්ධයෙන් පානදුර උතුර පොලිසිය පුළුල් විමර්ශන ක්රියාත්මකයි.
