නීතිපති දෙපාර්තමේන්තුවට රජයේ නීතිඥයින් (State Counsel) බඳවා ගැනීමට පැවති සම්මුඛ පරීක්ෂණයෙන් තෝරාගත් නීතිඥයින්ගේ නම් කපා දමා; විවිධ හිතවතුන්ගේ නම් ඇතුළත් කර පත්වීම් ලබාදීමට කළ උත්සාහයකට එරෙහිව රිට් ආඥාවක් ඉල්ලා අභියාචනාධිකරණයට පෙත්සමක් ගොනු ව තිබෙනවා.
දසත අධිකරණ වාර්තාකරු පැවසුවේ; නීතිපති දෙපාර්තමේන්තුවට රජයේ නීතිඥයින් 23 දෙනෙකු බඳවා ගැනීමට පසුගිය වසරේ දෙසැම්බර් මස 29 වැනි දින මේ වසරේ ජනවාරි 22 දින දක්වා කාලය තුළ අයදුම්පත් කැඳවූ බවයි.
ඒ සඳහා සමස්ත අයදුම්පත්‍ර 800ක් නීතිපති දෙපාර්තමේන්තුව වෙත ලැබී තිබුණු බව ද පැවසෙනවා.
එම අයදුම්පත් අතුරින් මූලික සුදුසුකම් සපුරා තිබූ අපේක්ෂකයන් 600ක් සිටි අතර සුදුසුකම් නොතිබූ අපේක්ෂකයන් 200කගේ අයදුම්පත් ප්‍රතික්ෂේප කෙරුණු බවයි වාර්තා වන්නේ.
මූලික සුදුසුකම් සහිත අපේක්ෂකයන් 600 දෙනාම දිනකට 20 ත් 30 ත් අතර ප්‍රමාණයක් වන සේ සම්මුඛ පරීක්ෂණ සඳහා කැඳවා පරීක්ෂණයට භාජනය කිරීමට ද කටයුතු කෙරුණා.
එම සම්මුඛ පරීක්ෂණයන්ගෙන් අනතුරුව අවසන් සම්මුඛ පරීක්ෂණය සඳහා අපේක්ෂකයන් 46 දෙනෙකු තෝරා ගෙන තිබුණා.
ඉන් අනතුරුව පුරප්පාඩු සංඛ්‍යාව 38ක් දක්වා වැඩි කර අවසන් සම්මුඛ පරීක්ෂණය සඳහා තෝරාගත් අයදුම්කරුවන් ගණන 76 දක්වා ඉහළ නංවා ඇති බවයි පෙත්සමෙන් සඳහන් කර ඇත්තේ.
කෙසේ වෙතත් නිසි ක්‍රියාදාමය තුළ සුදුස්සන් තෝරා ගැනීම සිදුවෙද්දී ඉහළ තැනකින් විවිධ සම්බන්ධතා සහිත අයවලුන්ගේ හිතවතුන් මේ සඳහා පත් කිරීමට කටයුතු කෙරෙන බව
හෙළිදරවු වන තත්ත්වයක දී මෙකී තනතුර සඳහා ඉල්ලුම් කළ සියලු සුදුසුකම් සහිතව සිටියදීත් නොතේරුණ අපේක්ෂකයින් විසින් මෙම පත්වීම් සම්බන්ධයෙන් සාධාරණ යුක්ති මූලධර්මයන්ට පටහැනි බවත්; ඒ නිසා දුන් සියලු පත්වීම් තහනම් කරමින් රිට් ආඥාවක් නිකුත් කරන ලෙසත් ඉල්ලා පසුගියදා (26) අභියාචනාධිකරණය වෙත පෙත්සමක් යොමු කෙරුණා.
නීතීපතිවරයා, රාජ්‍ය සේවා කොමිෂන් සභාවේ සභාපති, හිටපු නීතිපති සහ සොලිසිටර් ජනරාල් ඇතුළු 53 දෙනෙකු වගඋත්තරකරුවන් කරමින් මෙම පෙත්සම ගොනු කර තිබීම ද විශේෂත්වයක්.
