රන් ආලේප කර ව්‍යාජ ලෙස සකස් කරන ලද ස්වර්ණාභරණ උකසට තබා මුදල් ලබාගත් කාන්තාවක් හැටන් පොලිසිය විසින් ඊයේ (24) දින අත්අඩංගුවට ගෙන හැටන් මහේස්ත්‍රාත් අධිකරණය වෙත අද (25) දින ඉදිරිපත් කළ අවස්ථාවේ එම සැකකාරිණිය ව ලබන මස 09 වැනි දින දක්වා රක්ෂිත බන්ධනාගාරගත කිරීමට හැටන් මහේස්ත්‍රාත් එම්.ෆරුක්ඩින් මහතා නියෝග කර තිබෙනවා.
මෙසේ රක්ෂිත බන්ධනාගාරගත කර ඇත්තේ වටවල පොලිස් වසමට අයත් වැලිඔයවත්තේ පදිංචි 48 හැවිරිදි තිදරු මවක්.
කොළඹ ප්‍රදේශයේ රැකියාවක නිරත ව සිටින සැකකාර කාන්තාව රන් ආලේපිතව ව්‍යාජ ලෙස සකස් කරන ලද කුඩා මුදු, පංචායුද, කරාබු ආදිය හැටන් ඇතුළු වතු ආශ්‍රිත ප්‍රධාන නගරවල පිහිටි උකස් මධ්‍යස්ථාන, රාජ්‍ය සහ පෞද්ගලික බැංකු වෙත රැගෙන ගොස් උකස් කර මුදල් ලබා ගැනීමේ ජාවාරමක් කලක සිට සිදු කරගෙන ගොස් ඇති බවයි හෙළි ව ඇත්තේ.
උකස් ගන්නා රන් ආභරණ පරීක්ෂා කරන යන්ත්‍රවලට පවා හසු නොවන ආකාරයට මෙම ව්‍යාජ ස්වර්ණාභරණ සකස් කර ඇති බවත්, එම කාන්තාව එසේ සකස් කරන ලද ව්‍යාජ මුදු කිහිපයක් හැටන් නගරයේ පෞද්ගලික උකස් මධ්‍යස්ථානයක උකස් කිරීමට පැමිණි අවස්ථාවේ ඒ පිළිබඳ ව සැක සිතී එම උකස් මධ්‍යස්ථානයේ හිමිකරු හැටන් පොලිසියේ අපරාධ විමර්ශන අංශයට කළ දැනුම්දීමක් මත අත් අඩංගුවට ගැනීම සිදු කෙරුණා.
සැකකාර කාන්තාව විසින් මෙම ජාවාරම කාලයක් තිස්සේ සිදු කරගෙන ගොස් විශාල මුදලක් උපයාගෙන ඇති බවත්, සැකකාරිණිය විසින් හැටන් නගරයේ මෙවැනි ආකාරයට උකස් තැබූ ව්‍යාජ රන් ආභරණ පොලිස් භාරයට ගැනීමට කටයුතු කර ඇති බව හැටන් මූලස්ථාන ප්‍රධාන පොලිස් පරීක්ෂක රංජිත් ජයසේන මහතා ප්‍රකාශ කර තිබෙනවා.
