සැප්තැම්බර් මස 15 වැනි ඉරුදින දිවයින පුරා විවිධ පාසල් කේන්ද්‍ර කරගනිමින් පැවැත්වූ 2024 – 5 ශ්‍රේණිය ශිෂ්‍යත්ව විභාගයේ පළමු ප්‍රශ්න පත්‍රය විභාගයට පෙර දිනයේ දී පිටවීමේ සිදුවීමට එරෙහිව දිවයිනේ විවිධ ප්‍රදේශවල දෙමාපියන් එක් ව උද්ඝෝෂණය කෙරුණා.
මෙහිදී කැකිරාව කලාප අධ්‍යාපන කාර්යාලය ඉදිරිපිටදී ද අද (18) අසාධාරණයට ලක් වු දරුවන්ගේ දෙමාපියන් විසින් උද්ඝොෂණයක් සංවිධානය කර තිබෙනවා.
උද්ඝෝෂණය කරන ලද පිරිස විසින් කියා සිටින්නේ අසාධාරණයට ලක් වූ දරුවන් වෙනුවෙන් හැකි ඉක්මනින් සාධාරණ විසඳුමක් ලබාදෙන ලෙසයි.
මෙවැනි ම සිදුවීමක් අනුරාධපුරයෙන් ද වාර්තා වූ අතර වරකාපොළ සහ අලව්ව යන ප්‍රදේශවල ගුරුවරු පිරිසක් ද මෙලෙස කලින් දිනයේ දී රාත්‍රියේ අමතර පන්ති පවත්වමින් ප්‍රශ්න පත්‍රය දරුවන් සමග සාකච්ඡා කර ඇති බවයි වාර්තා වන්නේ.
ඒ අනුව ගාල්ල, කෑගල්ල, වරකාපොළ, අලව්ව, පූගොඩ සහ කැකිරාව යන ප්‍රදේශවල ද මෙලෙසින් උද්ඝෝෂණ සංවිධානය කර තිබුණා.
මෙම නීතිවිරෝධී ක්‍රියාවට දැඩි දඬුවම් ලබාදෙන ලෙසත්; අසාධාරණයට ලක් වූ තම දරුවන්ට යළිත් ශිෂ්‍යත්ව විභාගය පවත්වන ලෙසටත් තම දරුවන් යළිත් විභාගයට පෙනී සිටීමට සූදානම් බවත් විරෝධතාකරුවන් පවසනවා.
මේ අතර අද (18) පෙරවරුවේ බත්තර මුල්ලේ පිහිටි විභාග මධ්‍යස්ථානය ඉදිරිපිට ද දෙමාපියන් පිරිසක් විසින් උද්ඝෝෂණයක් සංවිධානය කර තිබෙනවා.
