පෙරේදා (15) දිනයේ දී නිමාවට පත් වූ මෙවර 5 ශ්‍රේණිය ශිෂ්‍යත්ව විභාගයට අදාළ ප්‍රශ්න පත්‍රය වේලාසනින් ම පිට වීම සම්බන්ධයෙන් වූ සිදුවීමක් අලව්ව සහ වරකාපොළ ප්‍රදේශවලින් ද වාර්තා වනවා.
දසත වාර්තාකරු පැවසුවේ; මෙම සිදුවීම සම්බන්ධයෙන් පැමිණිල්ලක් සිදු කිරීමට එම ප්‍රදේශයේ දෙමව්පියන් පිරිසක් හෙට (18) උදෑසන 8.30ට කෑගල්ල අධ්‍යාපන කාර්‍යාලයට සහ තවත් කණ්ඩායමක් බත්තරමුල්ල ශ්‍රී ලංකා විභාග දෙපාර්තමේන්තුව වෙත යාමට නියමිත බවයි.
මෙම සිදුවීමට ගුරුවරුන් දෙදෙනකු සම්බන්ධ බවට ද තොරතුරු ලැබී ඇති බවයි අප ප්‍රාදේශීය වාර්තාකරු සඳහන් කළේ.
ශිෂ්‍යත්ව විභාගයේ පළමු ප්‍රශ්න පත්‍රය ජංගම දූරකථනයකින් ඡායාරූපගත කර එය බෙදා හැර ඇති බවට ඊයේ (16) දිනයේ දී ශාලාධිපතිවරයෙකු ඇතුළු ගුරුවරු සයදෙනෙකුට චෝදනා එල්ල වී ඇති බවට ජාතික පුවත්පත්වල සහ වෙබ් අඩවිවල වාර්තා වුණා.
මෙම සිදුවීම සිදු වී ඇත්තේ අනුරාධපුර, රත්මලේතිස්ස විදුහලේදී වන බවත්; ඒ සම්බන්ධයෙන් ශ්‍රී ලංකා විභාග දෙපාර්තමේන්තුව ද විශේෂ විමර්ශනයක් ආරම්භ කර ඇති බවයි වාර්තා වූයේ.
අනුරාධපුර නගරයේ සහ නොච්චියාගම යන ප්‍රදේශවල පිහිටි රජයේ පාසල්වල සේවය කරන විදුහල්පතිවරයෙකු ඇතුළු පිරිසක් මෙම චෝදනාවට ලක් ව සිටින බවට තොරතුරු වාර්තා වුණා.
මෙම ප්‍රශ්න පත්‍රය අනුරාධපුර ,නොචිචියාගම, කොළඹ, ඇතුළු ප්‍රදේශ කිහිපයකට යවා ඇති බවට ද හෙළි ව තිබෙනවා.
