බ්‍රසීලයේ පැවති G20 කෘෂිකර්ම අමාත්‍ය මණ්ඩල රැස්වීමට සමගාමීව එතනෝල් නිෂ්පාදන තාක්ෂණය සම්බන්ධයෙන් ඉන්දියාව සමඟ සහයෝගයෙන් කටයුතු කිරීමට බ්‍රසීලය සිය කැපවීම ප්‍රකාශ කළා.
දෙරටේ කෘෂිකර්ම අමාත්‍යවරුන් අතර පැවති ද්විපාර්ශ්වික සාකච්ඡාවේ දී මෙම එකඟතාවට පැමිණ තිබෙනවා.
මෙම හමුවේදී විද්‍යාව හා තාක්ෂණය, එතනෝල් නිෂ්පාදනය සහ වෙළෙඳපොළ ප්‍රවේශය සම්බන්ධයෙන් දෙපාර්ශවයේ සහයෝගීතාව පිළිබඳව සාකච්ඡාවට ලක් වුණා.
නොවැම්බරයේ පැවැත්වෙන G20 නායකයින්ගේ රැස්වීමට පෙර ICAR (ඉන්දියාව) සහ EMBRAPA (බ්‍රසීලය) අතර අවබෝධතා ගිවිසුම අවසන් වනු ඇතැයි බලාපොරොත්තු පළ කරමින් විද්‍යාව හා තාක්ෂණය සම්බන්ධයෙන් සහයෝගයෙන් කටයුතු කිරීමට දෙපාර්ශ්වය ම එකඟ වූ බව ඉන්දීය මාධ්‍ය වාර්තා කරනවා.
ඉන්දියාව සිය බඩ ඉරිඟු, කපු, තිරිඟු, බාර්ලි සහ ළූණු සඳහා බ්‍රසීලියානු වෙළඳපොළට ප්‍රවේශ වීමට උත්සාහ කරන අතර බ්‍රසීලය අනෙකුත් නිෂ්පාදන අතර Citrus සඳහා ඉන්දියානු වෙළඳපොළට ප්‍රවේශ වීමට උත්සාහ කරනු ඇති.
දැනට වෙළෙඳාමට බාධාවක් වී ඇති ගැටලු විසඳීම පිළිබඳව අමාත්‍යවරුන් දෙදෙනාම සුබවාදී අදහස් පළ කර තිබෙනවා.
2024 ජුනි මාසයේදී, ජාත්‍යන්තර සීනි සංවිධානයේ (ISO) 63 වන සභා රැස්වීමේදී, උක් වගාව, සීනි සහ එතනෝල් නිෂ්පාදනය සහ අතුරු නිෂ්පාදන වඩා හොඳින් භාවිතා කිරීම සඳහා වඩාත් තිරසාර භාවිතයන් අනුගමනය කිරීමට ඉන්දියාව සාමාජික රටවලින් සහාය සහ සහයෝගීතාව ඉල්ලා සිටියා.
ඇමරිකා එක්සත් ජනපදයට සහ බ්‍රසීලයට පසුව ඉන්දියාව ගෝලීය වශයෙන් තුන්වන විශාලතම එතනෝල් නිෂ්පාදකයායි.
