පාස්පෝට් කන්තෝරුව අවට දැඩි දුර්ගන්ධයක් – ජනතාවගෙන් චෝදනා (ඡායාරූප)

මේ දිනවල (05) දැඩි අර්බුදකාරී තත්ත්වයක් ව පවතින ආගමන විගමන දෙපාර්තමේන්තුවෙන් සේවා ලබා ගැනීමේ ගැටලුව තවදුරටත් පවතින බවට තොරතුරු වාර්තා වනවා.

සිය ගුවන් ගමන් බලපත්‍ර ලබා ගැනීම, ඊට ඉල්ලුම් කිරීම සහ වෙනත් සේවා කටයුතු සඳහා බත්තරමුල්ල පිහිටි ආගමන හා විගමන දෙපාර්තමේන්තුවට පැමිණෙන ජනතාව තවදුරටත් දින ගණනාවක සිට දැවැන්ත පෝලිම්වල සිටින අයුරු දක්නට ලැබෙනවා.

මෙවන් පසුබිමක ආගමන හා විගමන දෙපාර්තමේන්තුව පිහිටි පරිශ්‍රය අවට දැඩි දුර්ගන්ධයක් ද හමන බවටයි තොරතුරු වාර්තා වන්නේ.

සේවා ලබා ගැනීමට එම පරිශ්‍රය වෙත පැමිණි ජනතාව චෝදනා කරන්නේ නිසි ලෙස කැලිකසළ බැහැර නොකිරීමත්, පැමිණි ඇතැම් පිරිස් විසින් භාවිත කරන ලද ආහාරපාන ඇතුළත් ව තිබූ අපද්‍රව්‍ය, පොලිතීන් උර පවා දෙපාර්තමේන්තුව අවට මෙන් ම, මාර්ගයේ දෙපස විසි කර ඇති බවයි.

මේ හේතුවෙන් දැඩි දුර්ගන්ධයක් මේ වනවිට එම ප්‍රදේශයෙන් හමන බවත්; ඊට හේතුව දින ගණනාවක සිට ගුවන් ගමන් බලපත්‍ර සකසා ගැනීම් ආදි සේවා කටයුතු සඳහා පෝලිම්වල රැඳී සිටින ජනතාව දැඩි අපහසුතාවකට පත් වීමත්, ආහාරපාන ගැනීමට හෝ ඒවා ඉවත දැමීමට ඇති කැලි කසළ බඳුන් වුව ද පිරී ඉතිරී තිබීමත් මීට හේතුව බවයි.