එප්පාවල – කැකිරාව බී.213 මාර්ගයේ කටියාව හන්දිය ආසන්නයේ වංගුවක් අසල දී පොලිස් සැරයන්වරයෙකු පැදවූ වෑන් රථයක යතුරුපැදියක් ගැටී සිදු වූ අනතුරකින් දෙදෙනකු ජීවිතක්ෂයට පත් ව කුඩා බිළිඳියක් බරපතළ තුවාල ලබා රෝහල්ගත කර තිබෙනවා.
ඊයේ (04) පස්වරුවේ මෙම අනතුර සිදු ව ඇති අතර; අනතුරින් මියගොස් ඇත්තේ එකම පවුලේ මව සහ දියණිය වන අතර ඔවුන් මකුලෑව – බෝගස්වැව ප්රදේශයේ පදිංචිකරුවන් වන එන්. චන්ද්රලතා නමැති 58 හැවිරිදි සිව්දරු මවක් සහ ඇගේ දියණිය වන ඉන්ද්රාණි වීරසිංහ නමැති 38 හැවිරිදි තිදරු මවක් බවයි පොලිසිය පැවසුවේ.
තුවාලකරුවන් අනුරාධපුර ශික්ෂණ රෝහලට ඇතුළත් කර ඇති බව ද එප්පාවල පොලිසිය පැවසුවා.
අනතුරින් ජීවිතක්ෂයට පත් වූ දියණියගේ සැමියා නාවික හමුදා සාමාජිකයකු වන බවත් එප්පාවල නල්ලමුදාව ප්රදේශයේ පිහිටි ඔහුගේ මහගෙදරට ගොස් නැවත මකුලෑවට ගමන් කරමින් සිටියදී මෙම අනතුරට මුහුණ පා ඇති බවත් හෙළි ව තිබෙනවා.
වෑන් රථ රියදුරා වන, පොලිස් සැරයන්වරයාට නින්ද යාම හේතුවෙන් එම වෑන් රථය මාර්ගයෙන් ඉවතට පැන ඉදිරියෙන් පැමිණි යතුරුපැදියේ ගැටී ඇති බවයි මූලික විමර්ශනවල දී අනාවරණය වී ඇත්තේ.
