ක්ලබ් වසන්ත ඝාතන සිද්ධිය සම්බන්ධයෙන් අත්අඩංගුවට ගත් සැකකාර කාන්තාව ඇතුළු සෙසු සැකකරුවන් 10 දෙනා අද (05) කඩුවෙල මහෙස්ත්‍රාත් අධිකරණය වෙත රැගෙන ආවා.
අප ප්‍රාදේශීය වාර්තාකරු පැවසුවේ මෙම සැකකරුවන් ව දැඩි පොලිස් ආරක්ෂාව මත අධිකරණ පරිශ්‍රයට රැගෙන ආ බවයි.
ඉකුත් නඩු දිනයේ දී මහේස්ත්‍රාත් චානිමා විජේබණ්ඩාරගේ නියෝගය පරිදි අද දිනයේ දී අදාළ නඩුව සම්බන්ධයෙන් බස්නාහිර දකුණ අපරාධ කොට්ඨාසයේ ස්ථානාධිපතිවරයා, නීතිපති දෙපාර්තමේන්තුව සහ ඝාතනයට ලක් වූ සුරේන්ද්ර වසන්ත පෙරේරාගේ පුතු සහ ඔහුගේ දේහය භාරගත් තැනැත්තා නීති කෘත්‍යය සඳහා අධිකරණයෙහි පෙනී සිටීමට නියමිත බවයි වාර්තා වන්නේ.
ක්ලබ් වසන්ත ඇතුළු දෙදෙනෙකුට මරු කැඳවූ අතුරුගිරි වෙඩිතැබීමේ සිද්ධියට සම්බන්ධ සැකකරුවන් තිදෙනෙකු අත්අඩංගුවට ගැනීම සඳහා පොලීසිය මහජන සහාය ද ඉල්ලා තිබුණා.
පසුගිය ජූලි 8 වනදා අතුරුගිරිය පොලිස් වසමේ ටැටූ මධ්‍යස්ථානයක් තුළ දී T56 ගිනිඅවිවලින් වෙඩි තබා ක්ලබ් වසන්ත සහ තවත් අයෙකු ඝාතනය කර තිබූ අතර එම වෙඩිතැබීමෙන් තවත් සිව්දෙනෙකු බරපතළ තුවාල ලැබුවා.
මෙම අපරාධය සම්බන්ධයෙන් සැකකරුවන් තිදෙනෙකු විමර්ශන නිලධාරීන් විසින් හඳුනාගෙන ඇති අතර සැකකරුවන්ගේ ඡායාරූප 03 පොලීසිය විසින් මාධ්‍ය වෙත ද නිකුත් කරනු ලැබුවා.
