කැනඩාවේ උසස් අධ්‍යාපනය හදාරමින් සිටි ලාංකික කථිකාචාර්යවරියක් ජීවිතක්ෂයට පත් ව තිබෙනවා.
මෙලෙස මියගොස් ඇත්තේ 29 හැවිරිදි එමාෂා විජේසිංහ නමැති තරුණියක් බවයි වාර්තා වන්නේ.
ඇය කුරුණෑගල, දොරටියාව – මල්ලවපිටියේ පදිංචිකාරිණියක්.
එමාෂා දරුණු පිළිකා රෝගී තත්ත්වයකින් පීඩා විඳි ඇති අතර, ඊට දිගු කලක සිට ප්‍රතිකාර ලබමින් ද සිට ඇති බවයි පැවසෙන්නේ.
එමාෂා විජේසිංහ කැනඩාවේ කොන්කෝඩියා විශ්වවිද්‍යාලයේ ගණිත අංශයෙන් දර්ශනපති පශ්චාත් උපාධිය හදාරමින් සිටියදියි මෙලෙස අවාසනාවන්ත අයුරින් ජීවිතක්ෂයට පත් ව ඇත්තේ.
ඇයට පිළිකා රෝගී තත්ත්වය වැළඳී ඇත්තේ උදර කොටසේ බවත් පැවසෙනවා.
එමාෂා විජේසිංහ යනු වයඹ රාජකීය විද්‍යාලයෙන් සිය මූලික අධ්‍යාපනය ලබා පසුව උසස් අධ්‍යාපනය සඳහා පේරාදෙණිය විශ්වවිද්‍යාලයට ඇතුළත් වූ තැනැත්තියක්.
පේරාදෙණිය සරසවියේ සහාය කථීකාචාර්යවරියක් ලෙස සේවය කරමින් සිටියදී වැඩිදුර අධ්‍යාපනය හැදෑරීමට 2023 වසරේ දී කැනඩාවේ කොන්කෝඩියා සරසවියට ඇතුළත් ව ඇති මැය රෝගී තත්ත්වය උත්සන්න වීම නිසාවෙන් යළි සිය ස්වාමිපුරුෂයා සමග මේ වසර මැද දිවයිනට පැමිණීමටයි සූදානමින් සිට ඇත්තේ.
ඇයගේ දේහය මේ වනවිට කුරුණෑගල, දොරටියාව, මල්ලවපිටිය නිවසේ තැන්පත් කර ඇති බවත් අවසන් කටයුතු කුරුණෑගල දී සිදු කිරීමට නියමිත බවත් වාර්තා වනවා.
