චමරිගෙන් 100ක් – ශ්‍රී ලංකාවෙන් මැලේසියාවට අසීරු ඉලක්කයක්

ශ්‍රී ලංකා කාන්තා ක්‍රිකට් කණ්ඩායමේ නායිකා චමරි අතපත්තු මැලේසියාවට එරෙහි ව ශතකයක් වාර්තා කිරීමට සමත් වුණා.

ඒ ඇයගේ තෙවැනි T20 ශතකයයි.

පන්දු 63ක දී ලකුණු 101ක් චමරිගේ සුපිරිම ඉනිම ඉදිරියෙන් ලියැවුණා.

නායිකා චමරි අතපත්තු පන්දුවාර 20 අවසානයේ දී නොදැවී පන්දු 65ක දී ලකුණු 119ක් ලබා සිටියා.

ඊට දැවැන්ත හයේ පහර 07ක් සහ හතරේ පහර 14ක් ඇතුළත් වුණා.

මෙම ශතකයත් සමග ආසියානු කුසලානයක ශතකයක් රැස් කළ පළමු වැනි ක්‍රීඩිකාව බවට ද චමරි අතපත්තු අද දිනයේ දී ඉතිහාසගත වුණා.

චමරිගේ සුපිරි ඉනිමට අනගි සහායක් දක්වමින් අනුෂ්කා සංජීවනී ලකුණු 31ක් ලබා ගත්තා.

චමරි හා අනුෂ්කා අතර පන්දු 65ක දී දැවැන්ත ලකුණු 115ක සබඳතාවක් ද ගොඩනැගුණා.

හර්ෂිතා සමරවික්‍රම ලකුණු 26යි.

පන්දුවාර 20 අවසානයේ දී ශ්‍රී ලංකා කණ්ඩායම කඩුලු 04ක් දැවී ලකුණු 184ක් ලබා ගත්තා.

කඩුලු බිඳ දැමීමේ දී මැලේසියාව වෙනුවෙන් Winifred Duraisingam කඩුලු 02ක් සහ Suabika Manivannan හා Mahirah Izzati Ismail එක් කඩුල්ල බැගින් බිඳ දැමුවා.

ඒ අනුව තරගය ජය ගැනීමට මැලේසියානු කාන්තා කණ්ඩායම පන්දු 120ක් තුළ ලකුණු 185ක් ලබා ගත යුතු වනවා.