රටේ සියලු දේශපාලන නායකයින් සහ සියලු පාර්ලිමේන්තු මන්ත්‍රීවරුන්ට ජාතික එකඟතාවයක් ඇති කර ගැනීම සඳහා, ජනාධිපතිවරයා යළි ආරාධනා කළ බව කැබිනට් ප්‍රකාශක, අමාත්‍ය බන්දුල ගුණවර්ධන පවසනවා.
අද (02) පැවති කැබිනට් තීරණ දැනුම්දීමේ මාධ්‍ය සාකච්ඡාවේ දී මාධ්‍යවේදියෙකු නැගූ ප්‍රශ්නයකට පිළිතුරු දෙමින් ඔහු මේ බව ප්‍රකාශ කළා.
මේ අතර, වත්මන් ජනාධිපතිවරයා යටතේ ජාතික ආණ්ඩුවක් පිහිටුවීමට සහාය ලබා නොදීමේ යෝජනාවක් සමගි ජන බලවේගය සම්මත කරගෙන තිබෙනවා.
වර්තමාන ජනාධිපතිවරයාගේ මූලිකත්වයෙන් ජාතික ආණ්ඩුවක් පිහිටුවීම සඳහා වූ යෝජනාවකට සමගි ජනබලවේගය කිසිදු ආකාරයකින් සහාය නොදිය යුතු බවට වූ යෝජනාවක් පාර්ලිමේන්තු මන්ත්‍රී බුද්ධික පතිරණ මහතා විසින් කණ්ඩායම් රැස්වීමට ඉදිරිපත් කරනු ලැබ තිබෙනවා.
එම යෝජනාවටයි සමගි ජනබලවේගයේ සියලු මන්ත්‍රීවරුන් එකඟතාව පළ කළ බව පක්ෂයේ ජාතික සංවිධායක තිස්ස අත්තනායක පැවසුවේ.
