2022 වසරේ මහත් ආන්දෝලනයකට තුඩු දුන් රුසියනු ඒරොෆ්ලෝට් ගුවන් යානයක් ශ්රී ලංකාවෙන් පිටව යාම වළක්වාලමින් කොළඹ වාණිජ මහාධිකරණය විසින් නිකුත් කළ තහනම් නියෝගයක් කටුනායක බණ්ඩාරනායක ගුවන් තොටුපළේ ගුවන් පාලක මැදිරියට ගොස් භාරදීමේදී නීතිඥ ආචාර ධර්ම උල්ලංඝනය කළේ යයි චෝදනා ලබා සිටි නීතිඥවරයෙක් එම චෝදනාවලින් නිදහස් කිරීමට ශ්රේෂ්ඨාධිකරණය අද (15) දින නියෝග කර තිබෙනවා.
ප්රීති පද්මන් සූරසේන ප්රමුඛ පුද්ගල ශ්රේෂ්ඨාධිකරණ විනිසුරු මඩුල්ලක් විසින් එම තීන්දුව ලබා දුන්නා.
අදාල සිද්ධියේදී වග උත්තරකාර නීතිඥවරයා නීතිඥ ආචාර ධර්ම උල්ලංඝනය කර ඇති බවට කරුණු අනාවරණය වී නොමැති හෙයින් ඔහු එම චෝදනාවෙන් නිදහස් කරන බවත් නඩු තීන්දුවේ සඳහන් වුණා.
වෙළඳ ගනුදෙනුවකට අදාලව අයර්ලන්ත සමාගමක් විසින් ඉදිරිපත් කළ පැමිණිල්ලක් සලකා බැලූ කොළඹ වාණිජ මහාධිකරණය 2022 වසරේ ජුනි මස 02 වනදා කොළඹ කටුනායක බණ්ඩාරනායක ගුවන් තොටුපොළට පැමිණි ඒරොෆ්ලොට් ගුවන් යානයක් මෙරටින් පිටවීම වළක්වාලමින් වාරණ නියෝගයක් නිකුත් කර තිබුණා.
එම වාරණ නියෝගය කටුනායක ගුවන් තොටුපොළේ පාලක මැදිරිය වෙතට භාරදීමට යාමේදී අදාල නීතිඥවරයා සිය නීතිඥ ආචාර ධර්ම උල්ලංඝනය කරමින් කටයුතු කළේ යැයි චෝදනා කරමින් ඔහුට එරෙහිව මෙම චෝදනා පත්රය නීතිපතිවරයා විසින් ඉදිරිපත් කරනු ලැබුවා.
