පානදුර, දකුණ පොලිස් වසමේ, උයන්කැලේ පාර,දොඹගහවත්ත ප්රදේශයේදී ඊයේ (08) රාත්රීයේ සැමියා විසින් ඔහුගේ බිරිඳගේ හිසට මන්නයකින් පහරදී තුවාල සිදුකොට රෝහල් ගත කර ඇතැයි පානදුර දකුණ පොලිසිය පවසනවා.
මෙසේ රෝහල් ගත කර ඇත්තේ, 47 හැවිරිදි දෙදරු මවකි.
ස්වාමියා එම නිවසේ ඉදිරිපස ආලින්ද කොටසේ සිට ඇති අතර ඔහුගේ බිරිඳ ඊට යාබද කාමරයේ දුරකථන ඇමතුමක රැඳී සිට තිබෙනවා.
එහිදී ස්වාමියා විසින් බිරිඳ සිටි කාමරයේ එකවරම විදුලි පහන් දල්වා ඇති අතර, එවිට ඔහු දැක ඇත්තේ ඔහුගේ බිරිඳ රැඳී සිටි දුරකථන ඇමතුම එකවරම විසන්ධි කර ඇති ආකාරයයි.
මෙම සිද්ධිය දුටු ස්වාමියා එකවරම මුළුතැන්ගෙට ගොස් එහි තිබූ මන්නයක් රැගෙන විත්, කාමරයේ ඇඳ මත වාඩි වී සිටි බිරිඳගේ හිසට එකවරම මන්නා පහරක් එල්ල කොට තිබෙනවා.
එම මන්නාපිහි පහරින් බිරිඳගේ හිසට මෙන්ම බෙල්ලට තුවාල සිදුව ඇති අතර හිසට වැඳුණු මන්නාපිහි පහර නිසා අධික ලේ ගැල්මත් සමඟම ඇය නිවසින් පිටතට දිව අසල තිබූ නිවසකට ගොස් ඇති බව සඳහන්.
අනතුරුව ප්රදේශවාසීන් එක්ව එම කාන්තාව පානදුර මූලික රෝහලට ඇතුළත් කිරීමට කටයුතු කර ඇති අතර මේ වනවිට හිසට ඇතිවූ බරපතල තුවාල තත්ත්වයෙන් එම කාන්තාව පානදුර මූලික රෝහලේ ප්රතිකාර ලබමින් සිටිනවා.
ඉන්පසුව පානදුර දකුණ පොලිසියට ලද නිර්නාමික දුරකථන ඇමතුමකට ක්රියාත්මක වූ පොලිසිය මෙම පහරදීම සිදුකළ 56 හැවිරිදි සැකකරු දොඹගහවත්ත පාර ප්රදේශයේ රැඳී සිටියදී තම බිරිඳට පහර දුන් මන්නා පිහිය ද සමඟ පොලිස් අත්අඩංගුවට ගෙන තිබෙනවා.
පානදුර දකුණ පොලිසිය ප්රකාශ කරන්නේ, මෙම අඹුසැමි යුවළ අතර කාලයක් තිස්සේ මෙසේ ආරවුල් පැවති බවත් මෙය එම ආරවුල් දුරදිග යාම නිසා ඇති වූ පහර දීමක් බවයි.
මෙම සිද්ධිය සම්බන්ධයෙන් පානදුර දකුණ පොලිසිය පානදුර කොට්ඨාස අපරාධ ස්ථාන පරික්ෂණ නිලධාරීන් වැඩිදුර විමර්ශන කටයුතු සිදු කරනු ලබයි.
