අනුරාධපුර බන්ධනාගාරයේ එළිමහන් සිර කඳවුරෙහි සිටි රැඳවියෙකු බන්ධනාගාර වගා භූමියේ සිටින අවස්ථාවේදී කිඹුලෙකුගේ ප්රහාරයකට ලක්ව තිබෙනවා.
මෙම රැඳවියා ඊයේ (22) සවස කිඹුලාගේ ප්රහාරයට ලක්ව ඇති අතර, පසුව එම ස්ථානයේ සිටි බන්ධනාගාර නිලධාරීන් සහ රැඳවියන් ඔහුව බේරාගෙන අනුරාධපුර ශික්ෂණ රෝහලට ඇතුලත් කිරීමට කටයුතු කර ඇති බවයි වාර්තා වන්නේ.
පහර කෑමෙන් රැඳවියාගේ ගෙල, අත හා පාදයට තුවාල සිදුවී තිබෙනවා.
බන්ධනාගාරය ආසන්නයෙන් ගලා බසින මල්වතු ඔයෙහි සිටින කිඹුලකු මෙසේ බන්ධනාගාර භූමියට පැමිණ ඇති අතර එහි සිටින කිඹුලන් නිසා මල්වතු ඔය දෙපස සිටින ජනයාගේ ජීවිත වලටද දැඩි අවදානමක් පවතිනවා.
ගම්වාසීන් සඳහන් කරන්නේ සංචාරක කර්මාන්තය දියුණු කිරීමේ අරමුණින් මල්වතු ඔයෙහි බෝට්ටු සේවාවක් ද ආරම්භ කර ඇති අතර ඒ සඳහා පැමිණෙන දෙස් විදෙස් සංචාරකයන්ගේ ජීවිත ද ඉතා අවදානමකට ලක් වීමට ඉඩකඩ ඇති බවයි.
