වෙළඳසැලකින් ඇඳුම් සොරකම් කිරීමේ චෝදනා ලබා සිටින නවසීලන්ත පාර්ලිමේන්තු මන්ත්රීවරියක් සිය මන්ත්රී ධුරයෙන් ඉල්ලා අස් වී තිබෙනවා.
මෙලෙස ඉල්ලා අස් වී ඇත්තේ නවසීලන්තයේ මධ්ය වාමාංශික හරිත පක්ෂයේ මන්ත්රීවරියක් වන ගොල්රීස් ග්රහමාන් නැමැති තැනැත්තියක්.
දැඩි මානසික ආතතියත් සමඟ තමන් මෙම සොරකම සඳහා පෙළඹුණු බවයි ගොල්රීස් නිවේදනයක් නිකුත් කරමින් කියා සිටියේ.
මෙම ක්රියාවට තමන්ට සමාවදීමට උත්සාහ නොකරන බවත්, නමුත් එය පැහැදිලි කිරීමට අවශ්ය බවත් ඇය එම නිවේදනයේ දක්වා තිබෙනවා.
ඉරානයේ උපත ලබා ඇති ගොල්රීස් ග්රහමාන් කුඩා කාලයේ සරණාගතභාවය පතා දෙමව්පියන් සමඟ කුඩා කාලයේ නවසීලන්තයට සංක්රමණය වී ඇති බව සඳහන්.
මේ වනවිට 42 හැවිරිදි වියේ පසුවන ඇය 2017 වසරේ දී නවසීලන්ත පාර්ලිමේන්තුවට තේරී පත් වුණා.
නීතිය හැදෑරීමෙන් පසු ඇය එක්සත් ජාතීන්ගේ මානව හිමිකම් නීතිඥවරියක් වූ අතර, 2017 දී පාර්ලිමේන්තුවට ඇතුළු වීමට පෙර ජාත්යන්තර අපරාධ අධිකරණවල කටයුතු කර තිබෙනවා.
ඕක්ලන්ඩ් නුවර සුඛෝපභෝගී වෙළෙඳසැලකින් ඇඳුම් සොරකම් කිරීම සම්බන්ධයෙන් චෝදනා ලැබ ඊට එරෙහිව පොලිස් පරීක්ෂණ ආරම්භ වූ අවස්ථාවේදීම ඇය මන්ත්රී ධුරයෙන් ඉල්ලා අස්වීමට තීරණය කළා.
