නවසීලන්තයේ ඕක්ලන්ඩ් වෙරළ තීරයේදී පසුගියදා අතුරුදහන් වූ ශ්රී ලංකික තරුණයෙකුගේ සිරුර හමුවී තිබෙනවා.
මෙලෙස මියගොස් ඇත්තේ 19 හැවිරිදි හිරාන් ජෝශප් නම් තරුණයෙක්. ඔහු අතුරුදන් වූයේ පසුගිය 2 වැනිදා ඕක්ලන්ඩ් හි කරෝයිටාහි වෙරළ තීරයේදීයි.
ඔහු තම වැඩිමහල් සහෝදරයා සහ සමීප මිතුරෙකු සමඟ පිහිනමින් සිටියදී මෙලෙස අතුරුදන්ව තිබෙනවා. ඔහුගේ සහෝදරයා සහ මිතුරා වෙරළට ආපසු ගිය නමුත් ජෝසප් අතුරුදහන් වී තිබුණා.
සෙවීමේ සහ ගලවා ගැනීමේ කාර්ය මණ්ඩලයට අතුරුදහන් වූ පිහිනුම් ක්රීඩකයාගේ සිරුර ඔහු අතුරුදහන් වූ ස්ථානයට කිලෝමීටර් 20ක් පමණ ඔබ්බෙන් වූ හැමිල්ටන් ගැප් ප්රදේශයෙන් සොයාගෙන තිබෙනවා.
ඔහු හමුවීමට පෙර ජීවිතාරක්ෂක කණ්ඩායම් දින පහක් එක දිගට ඕක්ලන්ඩ්හි නිරිතදිග වෙරළ තීරයේ සෝදිසි කර තිබූ බව සඳහන්.
ඔහු දක්ෂ පිහිනුම් ක්රීඩකයෙකු වූව ද ගසාගෙන යන රළ පහරට එරෙහිව සටන් කිරීමට ඔහුට හැකිවී නැහැ.
එක්වරම ඇති වූ දැඩි මුහුදු ප්රවාහයන් නිසා හිරාන් ඇතුලු තුන්දෙනා රළ පහරට හසුවී ඇති බවටයි අනාවරණ වී ඇත්තේ.
වෙරළේ සිටි ධීවරයින් කිහිප දෙනෙකු ප්රකාශ කර ඇත්තේ 2 වනදා මුහුද ඉතා රළු වී තිබූ බවයි.
නවසීලන්තයේ ජල ආරක්ෂණ ඒකකය පවසන්නේ දියේ ගිලීම නවසීලන්තයේ හදිසි අනතුරු මරණවලින් තුන්වන තැන ගන්නා බවයි.
නවසීලන්තයේ ජල ආරක්ෂණය 2023 දී වළක්වා ගත හැකිව තිබූ දියේ ගිලී මියයෑම් 90ක් වාර්තා කර තිබුණා.
