අවලෝකිතේෂ්වර බෝධි සත්ව නමින් පුද්ගලයෙකු බුදු දහමට හානි වන ලෙස ක්‍රියාත්මක වීම සම්බන්ධයෙන් අඟුලුගල්ලේ සිරි ජිනානන්ද හිමි අපරාධ පරික්ෂණ දෙපාර්තමේන්තුවට පැමිණිල්ලක් ඉදිරිපත් කර තිබෙනවා.
ජනවාරි පළමුවනදා විදේශයක සිට පැමිණි මොහු නොයෙක් ස්ථානවල රැදී සිටිමින් බුදු දහම විකෘති කරමින් ප්‍රකාශ කරන බවටයි උන් වහන්සේ පැමිණිල්ල මගින් ප්‍රකාශ කර ඇත්තේ.
මේ සම්බන්ධයෙන් යූ ටියුබ් සමාජ මාධ්‍ය ඔස්සේ කරුණු දැක්වූ පූජ්‍ය ගලගම කුසලධම්ම ස්වාමීන් වහන්සේට මරණ තර්ජන සිදුකර ඇති බවටද සඳහන්.
එමෙන්ම මොහු පසුගිය දිනවල ජීවිත විනාශ කර ගැනීමට පෙළඹවූ දේශකයා මෙන් සිය දිවි හානි කර ගැනීමට පොළොඹවන බව ද පැමිණිලිකරු පෙන්වා දී තිබෙනවා.
එමෙන්ම ගෞරවණීයම කාන්තා චරිතය වන යශෝධරා දේවියට අපහාස වන අන්දමින් මොහු ප්‍රකාශ නිකුත් කරන අතර ඔහුට එරෙහිව කටයුතු කළ හොත් පරිස්සම් වන්නැයි වැනි අදහසකින් නීතිපති හා අධිකරණ පද්ධතියට තර්ජනය කරන බවද එම පැමිණිල්ලේ සඳහන්.
මෙම පුද්ගලයා පිළිබඳ අපරාධ පරික්ෂණ දෙපාර්තමේන්තුවේ පරිගණක අපරාධ අංශයේ ආගමික පැමිණිලි අංශය හරහා පරික්ෂා කර නීතිය ක්‍රියාත්මක කිරීමටත් අධිකරණ නියෝගයක් ගෙන මානසික ප්‍රතිකාර සඳහා රෝහලකට ඉදිරිපත් කරන ලෙසත් ඉල්ලා සිටිමිනුයි අඟුලුගල්ලේ ජිනාන්ද පැමිණිල්ල ඉදිරිපත් කරමින් ඉල්ලා ඇත්තේ.
