ගංජා තොගයක් රැගෙන පැමිණෙමින් සිටි බ්‍රිතාන්‍ය ජාතිකයෙකු කටුනායක ගුවන් තොටුපොළ පැමිණීමේ පර්යන්තයේ දී පොලිස් මත්ද්‍රව්‍ය නාශක අංශයේ නිලධාරීන් පිරිසක් විසින් අත් අඩංගුවට ගෙන තිබෙනවා.
53 හැවිරිදි මෙම පුද්ගලයා ඊයේ (08) පස්වරු 01.30ට ලන්ඩන් නුවර සිට ශ්‍රී ලන්කන් ගුවන් සේවයේ UL- 504 දරන ගුවන් යානයෙන් කටුනායක ගුවන් තොටුපොළ වෙත පැමිණ තිබුණා.
ඔහු රැගෙන ආ ගමන් මලු තුළ සකස් කරන ලද ගංජා ග්‍රෑම් 40ක් සහ ගංජා ඇට 58ක් ඇසුරුම් 08ක් තුළ අසුරා ගෙන පැමිණෙමින් සිටියදී මෙලෙස අත් අඩංගුවට පත්වී තිබෙනවා.
මෙම බ්‍රිතාන්‍ය ජාතිකයා ලබන මාර්තු මාසය තෙක් ශ්‍රී ලංකාවේ රැඳී සිටීමට බලාපොරොත්තු වන අතර මෙම ගංජා ඇට වගා කර පානය කිරීම සඳහා රැගෙන ආ බවටයි සිදු කළ මූලික විමර්ශනවලදී අනාවරණය කර ගෙන ඇත්තේ.
පසුගිය වසරේ ද මෙම බ්‍රිතාන්‍ය ජාතිකයා ශ්‍රී ලංකාවට පැමිණ තංගල්ල ප්‍රදේශයේ රැදී සිටිය දී “කුෂ්” ගංජා ග්‍රෑම් 700කට අධික ප්‍රමාණයක් සමග පොලිස් මත්ද්‍රව්‍ය නාශක අංශයේ නිලධාරීන් පිරිසක් විසින් අත් අඩංගුවට ගෙන තංගල්ල අධිකරණයට ඉදිරිපත් කර වැරදිකරු වී දඩ මුදලක් ද ගෙවා නිදහස් වූ පුද්ගලයෙකු බව සඳහන්.
සැකකාර බ්‍රිතාන්‍ය ජාතිකයා අද මීගමුව මහේස්ත්‍රාත් අධිකරණය වෙත ඉදිරිපත් කිරීමට නියමිතයි.
