හෙට දිනයේ සිට වැට් බද්ද ඉහළ දැමූව ද පාන් ඇතුළු බේකරි නිෂ්පාදනවල මිල ඉහළ දැමීමක් සිදුනොකරන බව සමස්ත ලංකා බේකරි හිමියන්ගේ සංගමය පවසනවා.
වැට් බද්ද සියයට 18ක් දක්වා ඉහල දැමීම තුළින් බේකරි කර්මාන්තයට සහ බේකරි හිමියන්ට දැඩි බලපෑමක් එල්ලවනු ඇති බවයි එම සංගමයේ සභාපති එන්.කේ.ජයවර්ධන සඳහන් කළේ.
වැට් බද්ද වැඩි කිරීම හේතුවෙන් බේකරි කර්මාන්තයට හා බේකරි හිමියන්ට සිදුවන පාඩුව පිළිබඳව රජය සමඟ සාකච්ඡාකර විසඳුමක් ලබාගන්නා බව ඔහු වැඩිදුරටත් සඳහන් කර සිටියා.
මේ අතර වැට් බද්ද ඉහළ දැමීමට කටයුතු කිරීමත් සමඟ හෙට (01) දිනයේ සිට බත්, කොත්තු, ප්ලේන් ටී, කිරි තේ සහ සියලුම කෙටි ආහාරවල මිල ගණන් ඉහළ දමන බව සමස්ත ලංකා ආපනශාලා සහ අවන්හල් හිමියන්ගේ සංගමය සඳහන් කළා.
ඒ, අනුව ප්ලේන් ටී එකක් රුපියල් 5.00කින්, කිරි තේ එකක් රුපියල් 10.00කින් සහ සියලුම කෙටි ආහාර රුපියල් 10.00කින්, බත්, ෆ්‍රයිඩ් රයිස් සහ කොත්තුවක මිල රුපියල් 25.00කින් මිල ඉහළ දමන බවයි එම සංගමය සඳහන් කර සිටියේ.
