ශ්‍රී ලංකා ක්‍රිකට් කණ්ඩායමේ පරාජය පිටුපස, එක්තරා කණ්ඩායමක් සිටි බවත්, ඔවුන්ගේ කුමන්ත්‍රණකාරී වැඩපිළිවෙළ නිසා මෙම ඛේදනීය පරාජය අත් වූ බවත් ශ්‍රී ලංකා ක්‍රිකට් කණ්ඩායමේ තේරීම් කමිටුවේ සභාපති ප්‍රමෝදය වික්‍රමසිංහ පවසනවා.
ඒ අද අලුයම එක්දින ක්‍රිකට් ලෝක කුසලානයේ මූලික වටයේ තරගවලින් පරාජයට පත් වීමෙන් පසු, ශ්‍රී ලංකා ක්‍රිකට් කණ්ඩායම දිවයිනට පැමිණි අවස්ථාවේදීයි.
ශ්‍රී ලංකා ක්‍රිකට් තම ග්‍රහණයට ගැනීමට කැපවන බවත්, මේ පිළිබඳ සියලු තතු තව දින දෙකකින් ප්‍රසිද්ධ මාධ්‍ය හමුවේ ප්‍රකාශ කරමින් ශ්‍රී ලාංකීය ජනතාවට දැන ගැනීමට සැලැස්වීමට තමන් පියවර ගන්නා බවත් තේරීම් කමිටු සභාපතිවරයා පවසනවා.
ශ්‍රී ලංකා ක්‍රිකට් කණ්ඩායම රැගත් ශ්‍රී ලන්කන් ගුවන් සේවයේ යූ.එල්.- 174 දරන ගුවන් යානය අද අලුයම 05.05 ට ඉන්දියාවේ බැංගලෝර් නුවර සිටයි මෙරටට පැමිණියේ.
ශ්‍රී ලංකා ක්‍රිකට් ආයතනයේ නිලධාරීන් පිරිසක් ඔවුන් පිළිගැනීම සඳහා කටුනායක ගුවන් තොටුපොළ පැමිණීමේ පර්යන්තය වෙත එක් ව සිටියා.
ක්‍රිකට් කණ්ඩායම සමග පුහුණුකරුවන්, භෞත චිකිත්සකයන් ඇතුළු නිලධාරීන් සියලු ම දෙනා පැමිණි බවයි වාර්තා වන්නේ.
ඔවුන් වෙනුවෙන් කටුනායක ගුවන් තොටුපොළෙන් පිට ව යාම සඳහා පොදු බස් රථයක් ද සූදානම් කර තිබුණ ද බොහෝ ක්‍රීඩකයින් තම පෞද්ගලික මෝටර් රථවලින් සිය නිවෙස් බලා පිටත්ව ගිය අතර ඔවුන් වෙනුවෙන් කටුනායක ගුවන් තොටුපොළ සහ ඒ අවට වැඩි ආරක්ෂක නිලධාරීන් පිරිසක් ද යොදා තිබුණු බව ද අප ගුවන් තොටුපොළ වාර්තාකරු පැවසුවා.
ශ්‍රී ලංකා ක්‍රිකට් කණ්ඩායමට මෙවර එක්දින ලෝක කුසලානයේ දී අමිහිරි පරාජයක් උරුම වුණා.
ඒ ඔවුන් මුහුණ දුන් තරග 09න් 07ක් ම පරාජයට පත් වෙමින්.
ශ්‍රී ලංකා කණ්ඩායම ජය ගත්තේ වත්මන් ලෝක ශූර එංගලන්තයට එරෙහි තරගය සහ නෙදර්ලන්තයට එරෙහි තරගය පමණි.
ඊයේ පැවැති අවසන් තරගය ද ඔවුන් නවසීලන්තය ඉදිරියේ කඩුලු 05කින් පරාජයට පත් වුණේ, ප්‍රසාද ලකුණු පුවරුවේ 09 වැනි ස්ථානයට ඇද වැටෙමින්.
ඒ අනුව ශ්‍රී ලංකා කණ්ඩායමට එළඹෙන චැම්පියන්ස් කුසලානයට සුදුසුකම් ලැබීම මේ වනවිට අවිනිශ්චිත මට්ටමක පවතිනවා.
