ශ්‍රීලනිපයේ ලේකම් ධුරයේ අර්බුදය පක්ෂය ආරම්භයේ සිටම පැවතියා – සරත් ඒකනායක

ශ්‍රී ලංකා නිදහස් පක්ෂයේ ලේකම් ධුරය පිළිබඳ අර්බුදය පක්ෂය ආරම්භයේ සිටම පවතින්නක් බව එම පක්ෂයේ නියෝජ්‍ය මහලේකම් සරත් ඒකනායක පවසනවා.

අද (19) මහනුවර ප්‍රදේශයේ දී මාධ්‍ය හමුවක් කැඳවමින් නියෝජ්‍ය මහලේකම්වරයා මේ බව සඳහන් කළා.

එහිදී ඔහු කියා සිටියේ 1951 වසරේ පක්ෂය ආරම්භ කළ අවස්ථාවේදී ම බර්නාඩ් අලුවිහාරේ, බදුර්දීන් මහමුද් සහ තංගරාජා යන තිදෙනාම සම ලේකම්වරු වශයෙන් පත්කිරිමට බණ්ඩාරනායක මහතාට සිදුවූ බවයි.

මේ අතර දයාසිරි ජයසේකර හිටපු ලේකම්වරයාට එල්ල වන චෝදනා පිළිබඳව එම චෝදනා පත්‍රය ඉදිරිපත් කිරිමෙන් පසු නිශ්චිතව දැනගැනීමට හැකිවනු ඇති බවයි ඔහු මෙහිදී වැඩිදුරටත් සඳහන් කළේ.

එහිදී වැඩිදුරටත් අදහස් දැක්වූ නියෝජ්‍ය මහලේකම් සරත් ඒකනායක,

“හිටපු ලේකම්තුමා කියන විදියට ඔය ලක්ෂ ගණන් ඔට්ටු අල්ලපු කතා, පක්ෂය එක්සත් ජාතික පක්ෂයට පාවා දෙන කතා නිකම්ම කතා විතරයි. ඒ මහතාට දක්ෂ ලෙස කතා කරන්න පුළුවන්. සින්දු කියන්න පුළුවන් ඒක නම් අපි දන්නවා. රටේ පවතින තත්ත්වය අනුව කිසිම කෙනෙකුට,පක්ෂයකට තනි ගමනක් ගිහින් ආණ්ඩුවක් හදන්න බෑ කියන මතයේ තමයි මම ඉන්නේ. මම පක්ෂයේ මහලේකම් වුනොත් ශ්‍රී ලංකා නිදහස් පක්ෂයේ ප්‍රතිපත්ති පිළිගන්න සියලුදෙනා එකතු කරගෙන අපේ ආණ්ඩුවක් පිහිටුවන්න කටයුතු කරනවා”