රාමේෂ්වරම් ධීවරයන් විරෝධයක

ශ්‍රී ලංකා බලධාරීන් විසින් අත්අඩංගුවට ගෙන සිටින තම ධීවරයින් 17 දෙනෙකු නිදහස් කරන ලෙස බලකරමින් රාමේෂ්වරම් ධීවරයින් වර්ජනයක නිරත වනවා.

ධීවර යාත්‍රා 800ක් පමණ වරායේ නවතා ධීවරයන් මෙම විරෝධතාවයේ නිරතවන බවයි ඉන්දීය මාධ්‍ය වාර්තා කළේ.

පසුගිය බදාදා රාත්‍රී මුහුදු සීමා උල්ලංඝණය කළ ඉන්දීය ධීවරයන් 17 දෙනෙකු මෙරට නාවික හමුදාව විසින් අත්අඩංගුවට ගනු ලැබුවා.

ඔවුන්ගෙන් ධීවරයන් 8 දෙනෙකු රාමේෂ්වරම් ප්‍රදේශයේ ධීවරයන් වන අතර අනෙක් 9 දෙනා පුදුකෝට්ටයි දිස්ත්‍රික්කයේ ධීවරයන් පිරිසක්.

ඔවුන් සමග ධීවර යාත්‍රා 3ක් ද නාවික හමුදා භාරයට ගනු ලැබුවා. එම ඉන්දීය ධීවරයන් යාපනය මහේස්ත්‍රාත් අධිකරණයට ඉදිරිපත් කිරීමෙන් අනතුරුව නියෝග කර ඇත්තේ ලබන 27 වනදා දක්වා රක්ෂිත බන්ධනාගාර ගත කිරීමටයි.

මෙලෙස තම ධීවරයන් නිරන්තරයෙන් ශ්‍රී ලංකා ආරක්ෂක අංශවල අත්අඩංගුවට පත්වීමට ද විරෝධය දක්වමිනුයි රාමේෂ්වරම් ධීවරයන් වැඩ වර්ජනය ආරම්භ කර ඇත්තේ.

මධ්‍යම රජය සහ ප්‍රාන්ත රජය රාජ්‍යතාන්ත්‍රික පියවර ගනිමින් තම ධීවරයන් නිදස් කර ගැනීමට පියවර ගත යුතු බව ධීවර සංගමයේ නායක පී ජේසුරාජා ප්‍රකාශකර තිබෙනවා.

ඔවුන් පෙන්වා දෙන්නේ මෙම වසරේ ගතවූ කාලය තුළ පමණක් ශ්‍රී ලංකා නාවික හමුදාව විසින් තම ධීවරයන් 110 දෙනෙකු සහ යාත්‍රා 17ක් අත්අඩංගුවට ගෙන ඇති බවයි.

එම ධීවරයන් ශ්‍රී ලංකාවේ අධිකරණ මගින් නිදහස් කරනු ලබන්නේ යළිත් ශ්‍රී ලංකා මුහුදු සීමාවට නොපැමිණෙන බවට වන දැඩි ඇප කොන්දේසි මත වන අතර ඔවුන්ගේ යාත්‍රා සහ දැල් ආම්පන්න ද යළි ලබා නොදෙන බව රාමේෂ්වරම් ධීවරයන් ප්‍රකාශ කරනවා.