හොංකොං සහ දකුණු චීනයේ නගර කිහිපයකට ජල ගැලීම්වලින් දැඩි බලපෑම් එල්ලවී තිබෙනවා.
වාර්තාගත ලෙස පවතින අධික වර්ෂාපතනය හමුවේ නිලධාරීන් පාසල් සහ සේවා ස්ථාන වසා දමා ඇති බවයි විදෙස් මාධ්‍ය වාර්තා කළේ.
හොංකොං හි මාර්ග සහ උමං දුම්රිය ස්ථාන ජලයෙන් යටවී තිබෙනවා.
කාලගුණ කාර්යාංශය පවසන්නේ බ්‍රහස්පතින්දා ආරම්භ වූ වර්ෂාව වසර 140කට පමණ පසු නගරයට බලපෑ විශාලතම වර්ෂාව බවයි.
වැසි සමග සිදුවූ අනතුරු හේතුවෙන් පුද්ගලයන් 100කට වැඩි පිරිසක් රෝහල් ගත කර තිබෙනවා.
වර්ෂාව හේතුවෙන් හොංකොං හි කඳුකර ප්‍රදේශවල නායයෑම් ද සිදුවී ඇති අතර ඇතැම් අධිවේගී මාර්ග ද අවහිර වී ඇතැයි සඳහන්.
සිකුරාදා පස්වරුව වන විට, බලධාරීන් වැසි කුණාටුව “කළු” අනතුරු ඇඟවීමේ සිට “ඇම්බර්” අනතුරු ඇඟවීම දක්වා පහත දමා ඇති අතර වැසි තත්වය සෙනසුරාදා දක්වා පවතිනු ඇති බවටයි ඔවුන් අනතුරු අඟවන්නේ.
බ්‍රහස්පතින්දා, රාත්‍රියේ හොංකොං හි පැයකට මිලිමීටර් 158.1ක වර්ෂාපතනයක් වාර්තා කළ අතර එය 1884 වසරේ වාර්තා ආරම්භ වූ දින සිට වාර්තාවී ඇති වැඩිම වර්ෂාපතනයයි.
හොංකොං දූපතේ, කොව්ලූන් සහ නගරයේ ඊසානදිග කොටසේ මිලිමීටර් 200 කට වඩා වැඩි වර්ෂාපතනයක් වාර්තා වී තිබෙනවා.
Guangdong පළාතේ සිය ගණනක් ගුවන් ගමන් අත්හිටුවා ඇති අතර, ප්‍රාදේශීය බලධාරීන් පහත් බිම්වල පදිංචිකරුවන්ට ඉවත්වන ලෙස උපදෙස් දී තිබෙනවා.
