වයස අවුරුදු 13 ක බාල වයස්කාර දැරියක් අඹුව කරගත් පුද්ගලයෙකු සොයා විමර්ශන

වයස අවුරුදු 13 ක බාල වයස්කාර දැරියක් සමග වසරක පමණ කාලයක් අඹූ – සැමි ඇසුරක් පවත්වා ගෙන ගිය තරුණයෙකු අත්අඩංගුවට ගැනීම සදහා විමර්ශණයක් ආරම්භ කර ඇති බව මදුරන්කුලිය පොලීසිය කියයි.

සැකකරු ජා ඇල ප්‍රදේශයේ පදිංචිකරුවෙකු බවට හදුනා ගෙන ඇත.

බාල වයස්කාර තම දියණිය තරුණයෙකු සමග විවාහ වීමට සුදානම් වන බවට වන පැමිණිල්ලක් කාන්තාවක් විසින් මදුරන්කුලිය පොලීසියට කර ඇත.ඒ අනුව ක්‍රියාත්මක වී ඇති පොලීසිය පැමිණිළිකාර කාන්තාවගේ දියණියව කැදවා ප්‍රකාශ සටහන් කර ගෙන ඇත.

වසරක පමණ කාලයක් සැකකාර තරුණයා සමග තමන් ප්‍රේම සම්බන්ධතාවයක් පවත්වා ගෙන ගිය බව දැරිවිය පොලිසිය හමුවේ පවසා ඇත.එම කාලයේදී ඔහු තමන් සමග අඹූ – සැමි සම්බන්ධතා පැවැත්වූ බවද ඇය වැඩිදුරටත් පවසා ඇත.

දැරිවිය වෛද්‍ය පරීක්ෂණයක් සදහා පුත්තලම මූලික රෝහලේ අධිකරණ වෛද්‍ය නිලධාරීවරයා වෙත යොමු කර ඇත.

මදුරන්කුලිය පොලීසිය වැඩිදුර විමර්ශණ කටයුතු කරගෙන යයි.