මැඩගස්කරයේදී අත්අඩංගුවට ගෙන මේ වන විට අපරාධ පරීක්ෂණ දෙපාර්තමේන්තුව භාරයේ රඳවා සිටින මත්ද්‍රව්‍ය ජාවාරම්කරු නඳුන් චින්තක වික්‍රමරත්න හෙවත් හරක් කටා සහ සළිඳු මල්ෂික ගුණරත්න හෙවත් පානදුරේ කුඩු සලිදුගේ ජීවිතාරක්ෂාව තහවුරු කරන ලෙස ඉල්ලා ගොනු කර ඇති රිට් පෙත්සම් සත්‍ය කරුණු වසන් කරමින් ගොනුකර ඇති බැවින් ඒවා විභාගයට නොගෙන මුල් අවස්ථාවේදීම නිෂ්ප්‍රභ කරන ලෙස නීතිපතිවරයා අද අභියාචනාධිකරණයෙන් ඉල්ලීමක් කළා.
අදාළ පෙත්සම් අද අභියාචනාධිකරණයේදී කැඳවූ අවස්ථාවේදී අදාළ පෙත්සම් සදහා විරෝධතා ඉදිරිපත් කරමින් නීතිපතිවරයා මේ බව අධිකරණයට දැනුම් දුන්නා.
මෙම සැකකරුවන්ගේ ජීවිත ආරක්ෂාව තහවුරු කරන ලෙස ඉල්ලා ගොනු කළ නඩු කටයුත්තක් ඉකුත් මාර්තු මස 29 වැනිදා කොටුව මහේස්ත්‍රාත් අධිකරණය හමුවේ කැදවූ බවත් එහිදී මහෙස්ත්‍රාත් වරයා විසින් නියෝගයන් කිහිපයක් නිකුත් කර ඇති බව ද නීතිපතිවරයා ඉදිරිපත් කළ විරෝධතා වල සඳහන් වෙනවා.
සත්‍ය කරුණු වලින් තොරව හුදෙක් උපකල්පන මත පමණක් පදනම්ව මෙම පෙත්සම් ඉදිරිපත් කර ඇති බවටයි නීතිපතිවරයා චෝදනා කළේ.
මෙම පෙත්සම් වලින් පෙත්සම්කරුවන් ඉල්ලා සිටින සහන මහේස්ත්‍රාත් අධිකරණය මගින් දැනටමත් ලබාදී ඇති බැවින් මෙම පෙත්සම තවදුරටත් පවත්වාගෙන යාමට අවශ්‍යතාවක් මතු නොවන බවත් එම විරෝධතා වල සඳහන් කර තිබෙනවා.
එම කරුණු සැලකිල්ලට ගෙන අදාළ පෙත්සම් නිෂ්ප්‍රභ කරන ලෙසත් නීතිපතිවරයා අභියාචනාධිකරණයෙන් වැඩිදුරටත් ඉල්ලා සිටියා.
ඉන් අනතුරුව මෙම විරෝධතා වලට අදාල ප්‍රතිවිරෝධතා තිබේ නම් ඒවා අප්‍රේල් මස 22 දාට පෙර ගොනුකරන ලෙස අභියාචනාධිකරණ විනිසුරු මඩුල්ල විසින් පෙත්සම්කාර පාර්ශවයේ නීතිඥවරුන්ට නියෝග කළා.
පෙත්සම ජූනි මස 7 වන දා යළි සලකා බැලීමට නියමිතයි.
