තුර්කියට බලපෑ ප්රබල භූ කම්පනයෙන් දින 11කට පසු සුන්බුන් අතර සිරවී සිටි 14 හැවිරිදි පිරිමි ළමයෙකු සහ තවත් දෙදෙනෙකු සහන කණ්ඩායම් විසින් බේරාගෙන තිබෙනවා.
රික්ටර් මාපකයේ 7.8 ක කම්පනය තුර්කියට සහ සිරියාවට බලපෑම් සිදු කර පැය 260 කට පසුවයි මෙම තුන් දෙනා සුන්බුන් අතර සිරවී සිටියදී බේරා ගැනුනේ.
සහන කණ්ඩායම්වල නිලධාරින් විසින් සුන්බුන් අතර නැගෙන ශබ්ද අනුව කළ සොයා බැලීම්වලදී මෙම පිරිස සොයාගෙන තිබෙනවා.
බේරාගත් අනෙක් පුද්ගලයන් දෙදෙනා අවුරුදු 26 සහ 33 වයස්වල පසුවනවා.
පසුගිය 6 වනදා සිදු වූ භූමිකම්පාවෙන් තුර්කියේ සහ සිරියාවේ 44,000 කට අසන්න පිරිසක් මිය ගොස් ඇති අතර තවත් දස දහස් ගණනක් තුවාල ලබා තිබෙනවා.
එමෙන්ම අවතැන් වූ මිලියන ගණනක් ශීතල උෂ්ණත්වය හමුවේ නවාතැන් නොමැතිව සිටින බවයි විදෙස් වාර්තා පෙන්වා දෙන්නේ.
තුර්කි බලධාරීන් පවසන්නේ තම රට තුළ අවම වශයෙන් පුද්ගලයින් 38,044 දෙනෙකු මියගොස් ඇති බවයි. සිරියාවේ පුද්ගලයන් 5,800 කට වැඩි පිරිසක් මියගොස් ඇති බව සිරියානු රජය සහ එක්සත් ජාතීන්ගේ සංවිධානය ප්රකාශ කර තිබෙනවා.
තුර්කියේ ආපදා ඒජන්සියේ භූමිකම්පා සහ අවදානම් අවම කිරීමේ ඒජන්සියට ප්රකාශ කළේ සෑම විනාඩි හතරකටම එකක්, වශයෙන් පසුගිය සතියේ භූමිකම්පා ඇති වූ දිනයේ සිට පසු කම්පන 4,700 ක් පමණ සිදුවී ඇති බවයි.
මෙම පසු කම්පන බොහෝමයක් රික්ටර් මාපකයේ එකක 4ට වඩා වැඩි ඒවා බව ද සඳහන්.
එමෙන්ම ඉදිරි දිනවලදී රික්ටර් මාපකයේ 5 ක ප්රබල භූ කම්පනයක් ඇති විය හැකි බව ද එම ආයතනය අනතුරු අඟවනවා.
