ඉන්දීය සමාගමක් මගින් නිෂ්පාදිත සිරප් වර්ගයක් ලබා ගැනීමෙන් පසු උස්බෙකිස්ථානයේ ළමුන් 19 දෙනෙකු මියගොස් ඇතැයි විදෙස් මාධ්‍ය අනාවරණ කර තිබෙනවා.
අදාළ මරණවලින් අනතුරුව ඖෂධ නිෂ්පාදකයා සිය නිෂ්පාදන නතර කර ඇති බවයි වාර්තා වන්නේ.
උස්බෙකිස්තානයේ ළමුන් 19 දෙනෙකුගේ මරණවලට කැස්ස සිරප් වර්ගයක් හේතු වී ඇති අතර පරීක්ෂණවල ප්‍රගතිය මත පදනම්ව ඉදිරි ක්‍රියාමාර්ග ගැනීමට නියමිතයි.
ඉන්දියානු නිෂ්පාදක සමාගමේ නියෝජිතයෙකු පැවසුවේ සමාගම මෙම මරණ පිළිබඳව කනගාටු වන අතර එහි නිෂ්පාදනය නතර කර ඇති බවයි.
කැස්ස සිරප් නිෂ්පාදනවල සාම්පල ලබාගෙන පරීක්ෂා කිරීම සඳහා චන්දිගාර් හි ප්‍රාදේශීය ඖෂධ පරීක්ෂණ රසායනාගාරය වෙත යවා තිබෙනවා.
උස්බෙකිස්තානයේ සෞඛ්‍ය අමාත්‍යාංශය ප්‍රකාශ කළේ සමර්කන්ඩ් නගරයේ ළමුන් 18 දෙනෙකු ඉන්දීය සිරප් පානය කිරීමෙන් මිය ගිය බවයි.
අද එරට මාධ්‍ය වසරක් වයසැති දරුවෙකුගේ තවත් මරණයක් වාර්තා කර තිබෙනවා.
එමෙන්ම මෙම ඖෂධ ලියාපදිංචි කිරීම, ආනයනය කිරීම සහ අලෙවියට සම්බන්ධ පුද්ගලයින් කිහිප දෙනෙකු අත්අඩංගුවට ගෙන ඇති බව ද සඳහන්.
ලෝකය පුරා බොහෝ රටවලට විශ්වාසදායක සැපයුම්කරුවෙකු වන ඉන්දියාව මෙවැනි සිදුවීම් ඉතා බැරෑරුම් ලෙස සලකන බවයි ඉන්දීය විදේශ අමාත්‍යාංශයේ ප්‍රකාශකයෙකු පැවසුවේ.
උස්බෙකිස්තාන සෞඛ්‍ය අමාත්‍යාංශය මීට පෙර කියා සිටියේ මේ සම්බන්ධයෙන් සිදු කරන ලද පරීක්ෂණයකින් පසු සේවකයින් හත් දෙනෙකු සේවයෙන් පහ කළ අතර ඇතැම් විශේෂඥයින්ට එරෙහිව විනය පියවර ගත් බවයි.
ළමුන්ට මරු කැඳවූ ඖෂධ පෙති සහ සිරප් උස්බෙකිස්තානයේ සියලුම ඔසුසල්වලින් ඉවත් කර ඇති බව අමාත්‍යාංශය වැඩිදුරටත් සඳහන් කර තිබෙනවා.
මීටපෙර ද ඉන්දීය නිෂ්පාදනයක් වූ කැස්ස සිරප් වර්ගයක් හේතුවෙන් ගැම්බියාවේ ළමුන් 70 දෙනෙකු පමණ මරණයට පත්වුණා.
ඉන්දියාව ‘ලෝකයේ ඔසුහල’ ලෙස හඳුන්වනු ලබන අතර, පසුගිය දශකය තුළ එහි ඖෂධ අපනයනය දෙගුණයකින් වැඩි කර තිබෙනවා.
