බස්නාහිර පළාතේ පාසල් 149ක ඊයේ සිදු කළ විශේෂ මත්ද්‍රව්‍ය මෙහෙයුමකින් 47 දෙනෙකු අත්අඩංගුවට ගෙන තිබෙනවා.
අද මාධ්‍ය වෙත අදහස් දක්වමිනුයි පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී නිහාල් තල්දූව මේබව කියාසිටියේ.
උදෑසන 6.30 සිට 8 දක්වා එක් මෙහෙයුමක් ක්‍රියාත්මක වූ අතර අනෙක් මෙහෙයුම ක්‍රියාත්මක වී ඇත්තේ දහවල් 12 සිට පස්වරු 2.30 දක්වායි.
කෙසේවෙතත් මෙම මෙහෙයුම්වලදී පාසල් ඇතුලත පරීක්ෂා කිරීමක් සිදු නොවූ බවයි පොලිස් මාධ්‍ය ප්‍රකාශකවරයා කිසාසිටියේ.
පාසල් අවට වෙළඳසැල් 996ක් පරීක්ෂාවට ලක්කර ඇති අතර කුඩා පෙට්ටි කඩ වැනි වෙළඳසැල් 255ක් පරීක්ෂාවට ලක්කර තිබෙනවා.
එමෙන්ම පාසල් අවට විවිධ ද්‍රව්‍ය අලෙවි කරන ජංගම වෙළඳුන් 239 දෙනෙකු පරීක්ෂා කළ බවයි පොලිස් මාධ්‍ය ප්‍රකාශකවරයා කියාසිටියේ.
පාසල් ළමුන් ප්‍රවාහනය කරන වාහන 998ක් මෙහිදී පරීක්ෂාවට ලක්ව තිබෙනවා.
මෙහෙයුම් අතර ළමුන් සහ දෙමව්පියන් දැනුවත් කිරීමේ වැඩසටහන් ද ක්‍රියාවට නංවා තිබෙනවා.
මෙහිදී අත්අඩංගුවට ගත් සැකකරුවන් විවිධ මත්ද්‍රව්‍ය වර්ග පාසල් සිසුන් ඉලක්ක කර අලෙවි කිරීමට සූදානමින් සිටි අය බවටයි අනාවරණ වී ඇත්තේ.
මෙහිදී අයිස් මිලිග්‍රෑම් 2038ක්, හෙරොයින් මිලිග්‍රෑම් 9630ක් ගංජා ග්‍රෑම් 200ක් ඇතුලුව විවිධ වර්ගයේ මත්ද්‍රව්‍ය ද මෙහිදී සැකකරුවන් සතුව තිබී සොයාගෙන තිබෙනවා.
මාවා ඇතුළු විවිධ නම්වලින් හඳුන්වනු ලබන මත්වීම සඳහා ළමුන් අතර අලෙවි කරන මත්ද්‍රව්‍ය කිලෝග්‍රෑම් එකයි ග්‍රෑම් 260ක් සොයාගෙන තිබෙනවා.
ඒවා පාසල් ළමුන්ට පමණක් නොව විවිධ පුද්ගලයන් ඉලක්ක කර අලෙවි කරන බවයි නිහාල් තල්දූව මහතා කියාසිටියේ.
මේ අතර නිට්ටඹුව ප්‍රදේශයේ පාසල් සිසුවෙක් සතුව තිබී ඉතා සුළු ගංජා ප්‍රමාණයක් සොයාගෙන ඇති අතර ඔහුට එම ගංජා ලබාදුන් මත්ද්‍රව්‍යවලට ඇබ්බැහි වූ සැකකරු මෙන්ම ජාවාරම්කරුවෙක් ද අත්අඩංගුවට ගෙන තිබෙනවා. එම සැකකරුවන් අධිකරණයට ඉදිරිපත් කිරීමට නියමිතයි.
පාසල් තුල සෝදිසි මෙහෙයුම් සිදු කරනු ලබන්නේ ස්ථිරව තහවුරු කර ගත හැකි තොරතුරක් ලැබුණහොත් පමණක් බව ද පොලිස් මාධ්‍ය ප්‍රකාශකවරයා කියාසිටියා.
