අද (05) දිනයේ දී බේකරි හිමියන්ගේ සංගමය සමඟ තමන් සාකච්ඡාවක් පවත්වන බව වෙළඳ අමාත්‍ය නලීන් ප්‍රනාන්දු සඳහන් කළා.
එහිදී පාන් මිල සම්බන්ධයෙන් මේ අවස්ථාවේ තීරණයක් නොගන්නා ලෙස ඔවුන්ගෙන් ඉල්ලීමක් කරන බවයි ඔහු වැඩිදුරටත් සඳහන් කළේ.
එ මෙන්ම මෙම අවස්ථාවේ දී තිරිඟු පිටි මිල ඉහළ යාමට කිසිඳු හේතුවක් නොමැති බවයි වෙළඳ අමාත්‍යවරයා පැවසුවේ.
ඊයේ (04) පැවති මාධ්‍ය හමුවකට එක්වෙමින් අමාත්‍යවරයා සඳහන් කළේ, තිරිඟු පිටි පැවති මිලටම අලෙවි විය යුතු බවයි.
එලෙස පැවති මිලට තිරිඟු පිටි අලෙවි නොකරන වෙළඳුන් සම්බන්ධයෙන් පාරිභෝගික අධිකාරිය මඟින් අදාළ නීතිමය පියවර ගන්නා බවයි අමාත්‍යවරයා වැඩිදුරටත් සඳහන් කළේ.
තිරිඟු පිටි නිෂ්පාදන සමාගම් දෙක සමඟ තමන් ඉකුත් සිකුරාදා පැවැත් වූ සාකච්ඡාවක දී මාසයකට අවශ්‍ය පිටි නිෂ්පාදනය කිරීම සඳහා ප්‍රමාණවත් තිරිඟු තමන් සතුවට එම සාමාගම් ප්‍රකාශ කළ බව ද අමාත්‍යවරයා එහිදී සඳහන් කර සිටියා.
එමෙන්ම තුර්කිය සහ ඩුබායි වෙතින් ඇනවුම් කර ඇති තිරිඟු තොගයක් මෙම මස 15 වැනිදා වන විට මෙරටට ලැබෙන බව ආනයනකරුවන් පැවසූ බවත් ඔහු පැවසුවා.
එබැවින් ඉදිරියේදී පිටි හිඟයක් ඇති නොවන බව කී ඇමතිවරයා ආනයනය කළ තිරිඟුවලින් පිටි නිෂ්පාදනයේ දී වියදම වැඩිවීමක් හෝ අතිරේක වියදම් එක්වීමක් සිදුව නොමැති බැවින් පිටි හිඟයක් ඇති වූ පමණින් මිල වැඩිවිය නොහැකි බවයි එහිදී පෙන්වා දුන්නේ.
