ආනයනය කරනු ලබන වාහන සඳහා අදාළ රේගු ආනයන තීරු බදු මත, 50%ක අධිභාරයක් අය කිරීම රජය අද (16) සිට ක්රියාත්මක කිරීම තුළ වාහනවල මිල ගණන් ඉහළ යන බව ලංකා වාහන ආනයනය කරුවන්ගේ සංගමය පවසනවා.
එම සංගමයේ සභාපති ඉන්දික සම්පත් මිරිංචිගේ අද (16) මාධ්ය හමුවක් පවත්වමින් මේ බව සඳහන් කළා.
ඒ, අනුව සභාපතිවරයා සඳහන් කර සිටියේ මෙම 50%ක අධිභාරයක් අය කිරීම තුළ මෙරටට ආනයන කරනු ලබන හොන්ඩා වෙසෙල් වර්ගයේ මෝටර් රථයක් රුපියල් ලක්ෂ 10-12ත් අතර ගණනකින් මිල ඉහළ යන බවයි.
එමෙන්ම ටොයෝටා යාරිස් වර්ගයේ මෝටර් රථයක් රුපියල් ලක්ෂ 05ත් 06ත් අතර ගණනකින් සහ ඇල්ටෝ වර්ගයේ මෝටර් රථයක් ද රුපියල් 05ත් 06ත් අතර ගණනකින් මිල ඉහළ යන බවයි ඔහු පැවසුවේ.
ඊට අමතරව ටොයෝටා රේස් වර්ගයේ මෝටර් රථයක් ලක්ෂ 06-07ත් අතර ගණනකින් සහ ප්රාඩෝ 250 වර්ගයේ ජීප් රථයක මිල ලක්ෂ 30-35ත් අතර ගණනකින් මිල ඉහළ යන බවත් ඔහු වැඩිදුරටත් සඳහන් කර සිටියා.
ඒ, අනුව සභාපතිවරයා සඳහන් කර සිටියේ, වහනයක් මිල දී ගැනීමට බලාපොරොත්තුවනවා නම් පෞද්ගලිකව වාහන ආනයන කරගැනීමෙන් පරිබාහිරව මේ වනවිට වෙළඳපොළේ පවතින වහනයක් මිලදී ගැනීම වඩාත් සුදුසු බවයි.
වාහන ආනයනය මත පනවනු ලබන 30%ක රේගු ආනයන බද්දට 50%ක අධිභාරයක් පැනවීමට අදාළ ගැසට් නිවේදනය රජය විසින් නිකුත් කළ අතර, අද (16) සිට ක්රියාත්මක වන පරිදි මාස තුනක කාලයක් සඳහා මෙම අධිභාරය පැනවෙනවා.
