අක්මීමන, හියාරේ ප්රදේශයේ නිවසක තිබී අභිරහස් ලෙස මියගොස් සිටි කාන්තාවකගේ මළ සිරුරක් සොයා ගැනීමේ සිද්ධිය සම්බන්ධයෙන් සැකකරුවෙක් අත්අඩංගුවට ගත් බව පොලීසිය පවසනවා.
අදාළ සැකකරු ඊයේ (06) පෙරවරුවේ වේයන්ගොඩ, කුඹල්ඔලුව ප්රදේශයේ දී අත්අඩංගුවට ගැනුණු බවයි පොලිසිය වැඩිදුරටත් සඳහන් කළේ.
47 හැවිරිදි වියේ පසුවන සැකකරුවෙක් මෙලෙස අත්අඩංගුවට ගෙන ඇති අතර, සැකකරු විසින් පසුගිය 04 වන දින රාත්රියේ අදාළ කාන්තාව පදිංචිව සිටි නිවසට ඇතුළු වී ඇයව දූෂණය කිරීමෙන් අනතුරුව ගෙළ සිරකර ඝාතනය කර ඇති බවයි අනාවරණය වී ඇත්තේ.
පසුව එම කාන්තාව සන්තකයේ තිබී රන් මාලයක්, කරාඹු යුගලයක් සහ ජංගම දුරකථන දෙකක් ද සොරාගෙන සැකකරු පළාගොස් තිබෙනවා.
අත්අඩංගුවට ගැනුණු සැකකරු අද (07) දින ගාල්ල මහේස්ත්රාත් අධිකරණය හමුවට ඉදිරිපත් කිරීමට නියමිත බවයි අක්මීමන පොලිසිය පැවසුවේ.
වයස අවුරුදු 65ක පමණ කන්තාවකගේ මළ සිරුරක් ඇය පදිංචිව සිටි අක්මීමන, හියාරේ ප්රදේශයේ නිවසේ තිබිය දී පෙරේදා (05) රාත්රියේ පොලිසිය විසින් සොයා ගත්තා.
ඒ, එම කාන්තාවගේ දියණිය විසින් පොලිසියට ලබන්දුන් තොරතුරකට අනුවයි.
පසුව සිදුකළ විමර්ශනවල දී අනාවරණය වී ඇත්තේ ඇය පැළඳ සිටි මාලය, කරාඹු යුගළය කිසිවෙකු විසින් ගලවාගෙන ගොස් තිබූ බවයි.
එමෙන්ම ඇයගේ මුහුණේ ද තුවාල සිදුව ඇති බවට නිරීක්ෂණය වූ බව පොලිසිය සඳහන් කළා.
