හම්බන්තොට ධීවර වරායේ වෙරළ ආරක්ෂක නිලධාරීන් සහ ධීවරයන් පිරිසක් අතර අද (09) දහවල් ඇති වූ ගැටුමකින් දෙදෙනෙකු තුවාල ලබා හම්බන්තොට මහ රෝහලට ඇතුළත් කර ඇති බව වාර්තා වනවා.
මෙහිදී ඇති වූ නොසන්සුන්කාරී තත්ත්වය පාලනය කිරීම සඳහා වෙරළ ආරක්ෂක නිලධාරීන් විසින් බිමට වෙඩි තැබීමක් ද සිදුකර ඇති බවයි පොලිසිය සඳහන් කළේ.
වෙඩි තැබීමෙන් කිසිවකුටත් හානියක් සිදුව නැහැ.
හම්බන්තොට ධීවර වරායෙන් මුහුදුගිය ඩිංගි බෝට්ටුවක් සහ බහුදින ධීවර යාත්රාවක් මුහුදේ දී ගැටී ඇති අතර, ඒ සම්බන්ධව දෙපාර්ශවයේම ධීවරයන් වෙරළ ආරක්ෂක නිලධාරීන්ට පැමිණිලි කර තිබෙනවා.
එහිදී අදාළ පාර්ශ්වයන් සමතයකට පත්ව ඇති අතර, අනතුරුව ධීවර කාර්මිකයින් පිරිසක් වෙරළ ආරක්ෂක නිලධාරීන් සමඟ ආරවුලක් ඇතිකර ගැනීමත් සමඟ මෙම නොසන්සුන්කාරී තත්ත්වය ඇති වූ බවයි තොරතුරු වාර්තා වුණේ.
සිද්ධියට සම්බන්ධ ධීවරයින් 08 දෙනෙකු හම්බන්තොට පොලිසිය විසින් අත්අඩංගුවට ගෙන තිබෙනවා.
