හංවැල්ල ව්‍යාපාරිකයා ඝාතනයේ සැකකාර “කරවිට සීයා” වෙඩි කා නසී

පුද්ගල ඝාතනයක් සම්බන්ධයෙන් අවශ්‍යව සිටි සැකකරුවෙකු පොලීසිය සමඟ සිදුවූ වෙඩි හුවමාරුවකදී මියගොස් ඇති බව වාර්තා වනවා.

මෙලෙස මියගොස් ඇත්තේ “කරවිට සීයා” නමැති අන්වර්ථ නාමයෙන් හඳුන්වන පුද්ගලයෙක් බවයි පොලිසිය සඳහන් කළේ.

මෙම තැනැත්තා පසුගිය දෙසැම්බර් මස 18 වන දින හංවැල්ල, හරස් පාරේ ආපනශාලාවක හිමිකරුවෙකුට වෙඩි තබා ඝාතනය කිරීමේ සිද්ධියට අදාළව අවශ්‍යව සිටි සැකකරුවෙකු බව්කයි පොලිසිය වැඩි දුරටත් සඳහන් කළේ.

හංවැල්ල ප්‍රදේශයේ ආපනශාලා හිමිකරු ඝාතනය කිරීමේ සිද්ධියට අදාළව වැඩිදුරටත් සිදුකළ විමර්ශනවලදී මෙම සැකකරු හංවැල්ල, නිරිපොළ ප්‍රදේශයේ රැඳී සිටින බවට ලද තොරතුරකට අනුව පොලීසිය ඔහුව අත්අඩංගුවට ගැනීමට අද (06) අලුයම මෙහෙයුමක් ආරම්භ කර තිබෙනවා.

එහිදී සැකකරු විසින් පොලීසියට වෙඩි ප්‍රහාරයක් එල්ලකර ඇති අතර, ආරක්ෂාව වෙනුවෙන් පොලිසිය සිදුකළ වෙඩි තැබීමේ දී සැකකරු බරපතළ තුවාල ලබා ඇති බවයි වාර්තා වන්නේ.

පසුව බරපතළ තුවාළ ලැබූ සැකකරු අවිස්සාවේල්ල රෝහලට ඇතුළත් කිරීමෙන් අනතුරුව ජීවිතක්ෂයට පත්ව තිබෙනවා.

පොලිස් වෙඩි පහරින් මෙලෙස මියගොස් ඇත්තේ දෙල්වල පොලිස් වසමේ පිටකන්ද, උඩුකරවිට ප්‍රදේශයේ පදිංචි 32 හැවිරිදි පුද්ගලයෙක්.