සුනඛයෙකු සපා කෑම හේතුවෙන් මොනරාගල දිස්ත්‍රික් මහ රෝහල වෙත ප්‍රතිකාර ලබා ගැනීම සඳහා එන්නත් ලබා ගැනීමට පැමිණි පුද්ගලයෙකුගේ බිරිඳට කොරෝනා වෛරසය ආසාදනය වී ඇති බවට රෝහලේදී සිදුකළ ක්ෂණික ප්‍රතිදේහ පරීක්ෂණයෙන් අනාවරණය වී තිබෙනවා.
වැල්ලවාය, රණ්දෙනිගොඩයාය ප්‍රදේශයේ පදිංචි අඹුසැමි යුවලක් අද දින මොනරාගල දිස්ත්‍රික් මහ රෝහල වෙත පැමිණ තිබු අතර සුනඛයා සපා කෑමෙන් තුවාල ලැබූ ස්වාමිපුරුෂයා ඊට අවශ්‍ය එන්නත ලබා ගන්නා තෙක් බිරිඳ තමාට තිබු මද උණ ගතිය සඳහා ප්‍රතිකාර ලබා ගැනීමට රෝහලේ භාහිර රෝගී අංශයට ගොස් තිබෙනවා.
එම අවස්ථාවේදී මොනරාගල රෝහලේ භාහිර රෝගී අංශයෙන් මෙම කාන්තාව ප්‍රතිකාර ලබාගෙන ඇති අතර මද උණ ගතියෙන් පෙලීම හේතුවෙන් ඇයට රෝහල් කාර්ය මණ්ඩලය විසින් ක්ෂණික ප්‍රතිදේහ පරීක්ෂාවක් සිදුකර පසුව PCR පරීක්ෂණයක් සඳහා ද යොමු කොට තිබෙනවා.
ක්ෂණික ප්‍රතිදේහ පරීක්ෂණයේ ප්‍රථිපල ලැබීමට පෙර මෙම අඹුසැමි යුවල රෝහලෙන් පිටත්ව ගොස් මොණරාගල සිට වැල්ලවාය බලා දිවෙන පෞද්ගලික බස් රථයකින් තම නිවෙස බලා පැමිණ තිබෙනවා.
ඔවුන් බස් රථයේ ගමන් කරමින් සිටින අවස්ථාවේදී කාන්තාවගේ ක්ෂණික ප්‍රතිදේහ පරීක්ෂණයේ වාර්තා ලැබී ඇති අතර එහිදී ඇය කොවිඩ් ආසාදිතයෙකු ලෙස අනාවරණය වීම හේතුවෙන් මොණරාගල රෝහලෙන් ඒ පිළිබඳව වැල්ලවාය සෞඛ්‍ය වෛද්‍ය නිලධාරිවරයා දැනුවත් කිරීමට පියවර ගෙන තිබෙනවා.
ඒ අනුව වැල්ලවාය සෞඛ්‍ය වෛද්‍ය නිලධාරී කාර්යාලයේ වෛද්‍යවරුන් ඇතුළු නිලධාරීන් විසින් වැල්ලවාය බස්නැවතුම වෙත බස් රථය පැමිනෙන තුරු සිට එම දෙදෙනා ආරක්ෂිතව බස් රථයෙන් බස්සවා ගැනීමට අවශ්‍ය කටයුතු කර තිබෙනවා.
පසුව එම බස් රථය සහ වැල්ලවාය බස් නැවතුම්පොළ ද විෂබීජහරණය කිරීමට පියවර ගෙන කොට ආසාදිත කාන්තාව රෝහල් ගත කිරීමට පියවර ගත් බව වැල්ලවාය සෞඛ්‍ය වෛද්‍ය නිලධාරී කාර්යාලයේ නිලධාරීයෙකු සදහන් කර සිටිනවා.
මෙම කාන්තාවගේ සමීප ආශ්‍රිතයින් PCR පරීක්ෂණ සඳහා ලක් කිරීමට සැලසුම් කොට ඇති බවයි සෞඛ්‍ය නිලධාරීන් සඳහන් කලේ.
