රත්මලාන ගුවන්තොටුපළ මාර්ගයේ ධාවනය වෙමින් තිබූ ත්රිරෝද රථයක් නවතා, එහි රියදුරු සන්තකයේ තිබූ රුපියල් 380,000ක මුදලක් කොල්ලකෑ බව කියන පොලිස් කොස්තාපල්වරුන් දෙදෙනෙකු ගල්කිස්ස කොට්ඨාස අපරාධ විමර්ශන කාර්යාංශය විසින් අත්අඩංගුවට ගෙන තිබෙනවා.
මෙලෙස අත්අඩංගුවට ගෙන ඇත්තේ ගල්කිස්ස මූලස්ථාන පොලිසියේ විවිධ පැමිණිලි අංශයට අනුයුක්තව සේවය කරන කොස්තාපල්වරුන් දෙදෙනෙක්.
රත්මලාන ගුවන්තොටුපොළ මාර්ගයේ දී ඉකුත් 15 වනදා මෙම කොල්ලකෑම සිදුව ඇතැයි බවයි වාර්තා වුණේ.
සිද්ධිය සම්බන්ධයෙන් මොරටුව, අඟුලාන, සයුරුපුර මහල් නිවාස සංකීර්ණයේ පදිංචි පුද්ගලයෙකු විසින් පොලිසියට කරන ලද පැමිණිල්ලක් මත ක්රියාත්මක වූ විමර්ශන නිලධාරීන් විසින් සැකකාර කොස්තාපල්වරුන් දෙදෙනා අත්අඩංගුවට ගෙන තිබුණා.
කෙසේ වෙතත් කොල්ලකෑමට ලක්වූ මුදල් සීට්ටු මුදල් බවට පවසමින් පැමිණිල්ල සිදුකර ඇති අතර, ඒ සම්බන්ධයෙන් ඇති වූ සැකය මත පොලිසිය වැඩිදුර විමර්ශන සිදුකර තිබෙනවා.
එහිදී එම ප්රකාශය අසත්ය බවට අනාවරණය වීම හේතුවෙන්, සිද්ධියට සම්බන්ධ පැමිණිලිකාර පුද්ගලයා සහ තවත් කාන්තාවක ද පොලිසිය විසින් අත්අඩංගුවට ගැනීමටයි කටයුතු කර ඇත්තේ.
සිද්ධිය සම්බන්ධයෙන් ගල්කිස්ස කොට්ඨාස අපරාධ විමර්ශන කාර්යාංශය වැඩිදුර පරීක්ෂණ පවත්වනු ලබනවා.
