ඊෂි කෑෂ් ක්රමයට මත්ද්රව්ය ජාවාරම් සිදු කරනු ලැබූ සැකකරුවන් දෙදෙනෙක් සම්බන්ධයෙන් නීති විරෝධී වත්කම් විමර්ශන කොට්ඨාසය මඟින් මුදල් විශුද්ධිකරණය වැළැක්වීමේ පනත යටතේ දීර්ඝ ලෙස විමර්ශනයක් සිදුකර තිබුණා.
එහිදී සිරිසර උයන, බේස්ලයින් මාවත, බොරැල්ල ලිපිනයේ පදිංචි අඹු සැමි යුවළක් විසින් 2017 වසරේ සිට මේ දක්වා මත්ද්රව්ය ජාවාරම් සිදුකර ඇති බවත්, එයින් ලද මුදල් සැකකාරියගේ මවගේ ගිණුම් වෙත තැම්පත් කර ඇති බවත් අනාවරණය කරගගත් බවයි පොලිසිය පවසන්නේ.
තවද, සැකකාරිය විසින් නීති විරෝධි ලෙස උපයා ගන්නා ලද මුදල් යොදවා අතුරුගිරිය, ඔරුවල ශාන්ත ලෝකාගම, කොරතොට, 08 වන පටුමගේ පිහිටි පර්චස් 06 ක ඉඩමක් හා එම ඉඩමේ ඉදිකර ඇති නිවස 2023 වර්ෂයේ දෙසැම්බර් මස රුපියල් ලක්ෂ 300 කට ආසන්න මුදලකට මිලදී ගෙන ඇති බවට තොරතුරු අනාවරණය වී තිබෙනවා.
ඒ අනුව මෙම සැකකරුවන් විසින් මිලදී ගන්නා ලද මෙම නිවස සහිත ඉඩමට මුදල් විශුද්ධිකරණය වැළැක්වීමේ පනත ප්රකාරව ඊයේ (20) දින සිට දින 07 ක් සඳහා ක්රියා විරහිත කිරීමේ නියෝගයක් නිකුත් කර ඇති බවයි පොලිසිය දැනුම්දෙන්නේ.
ඊයේ (20) දින අතුරුගිරිය ඔරුගොඩ ප්රදේශයේදී සැකකාර අඹු සැමි යුවළ නීති විරෝධී වත්කම් විමර්ශන කොට්ඨාසයේ නිලධාරීන් විසින් අත්අඩංගුවට ගෙන තිබෙනවා.
සැකකාරිය අවුරුදු 32 ක් හා සැකකරු අවුරුදු 37 ක් වන බොරැල්ල ප්රදේශයේ පදිංචිකරුවන්.
මත්ද්රව්ය ජවාරමෙන් උපයා ගන්නා ලද මුදල් තැම්පත් කර ඇති බවට සැක කරන සැකකාරියගේ, සැකකරුගේ හා සැකකාරියගේ මවගේ නමින් පවත්වා ගෙන යනු ලබන බැංකු ගිණුම් 06 ක් සම්බන්ධයෙන් හා සැකකරුගේ නමින් මිලදී ගෙන ඇති සුඛෝපභෝගී කාර් රථයක් සම්බන්ධයෙන් ද නීති විරෝධී වත්කම් විමර්ශන කොට්ඨාසය විසින් වැඩිදුර විමර්ශන සිදු කරනු ලබනවා.
