බොරැල්ල, වනාතමුල්ල, හල්ගහවත්ත ප්‍රදේශයේ ඊයේ (13) රාත්‍රීයේ සිදුකළ මත්ද්‍රව්‍ය වැටලීමක් අතරතුර සිදුවූ වෙඩිවැදීමකින් කාන්තාවක් මිය යාමේ සිද්ධියට අදාළ යුද හමුදා සාමාජිකයින් දෙදෙනා අත්අඩංගුවට ගෙන ඇති බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී නිහාල් තල්දූව සඳහන් කළා.
බොරැල්ල පොලිසිය මඟින් මෙලෙස අත්අඩංගුවට ගෙන ඇත්තේ යුධ හමුදා බුද්ධි අංශ නිලධාරීන් දෙදෙනෙක් බවයි මාධ්‍ය ප්‍රකාශකවරයා වැඩිදුරටත් පැවසුවේ.
යුධ හමුදා බුද්ධි අංශයට ලද තොරතුරක් මත බොරැල්ල, වනාතමුල්ල, හල්ගහවත්ත ප්‍රදේශයේ මත්ද්‍රව්‍ය වැටලීමක් සඳහා බුද්ධි අංශ නිලධාරීන් ඊයේ (13) පස්වරුවේ මෙහෙයුමක් දියත්කර තිබෙනවා.
එම වැටලීම අතර තුර පුද්ගලයෙකු අත්අඩංගුවට ගැනීමට යාමේදී ඇතිවූ සිදුවීමක දී බුද්ධි අංශ සාමාජිකයෙකුගේ ගිනිඅවියක් එක්වර ක්‍රියාත්මකවී ඒ අසල සිටි කාන්තාවකට වෙඩි වැදී ඇති බවයි වාර්තා වුණේ.
මෙලෙස වෙඩි වැදී ඇත්තේ බොරැල්ල, හල්ගහකුඹුර ප්‍රදේශයේ පදිංචි 25 හැවිරිදි දෙදරු මවක් බවයි පොලිසිය සඳහන් කළේ.
වෙඩි වැදුණු කාන්තාව රෝහල් ගතකිරීමෙන් අනතුරුව මියගොස් තිබෙනවා.
