මාර්තු මස 09 වනදා පළාත් පාලන ඡන්ද විමසීම පැවැත්වීම වැලැක්වීමේ නියෝගයක් නිකුත් කරන මෙන් ඉල්ලා විශ්රාමික යුධ හමුදා කර්නල් වරයෙකු වන ඩබ්ලිව්. එම්. ආර්. විජේසුන්දර මහතා විසින් ඉදිරිපත් කළ රීට් පෙත්සම සලකා බැලීම සඳහා සැප්තැම්බර් මස 04 වනදා කල්තැබීමට ශ්රේෂ්ඨාධිකරණය නියම කළා.
මෙම පෙත්සම අද එස්. තුරයි රාජා, ඒ එච්.එම්.ඩී නවාස් සහ ශිරාන් ගුණරත්න යන මහත්වරුන්ගෙන් සමන්විත ත්රිපුද්ගල විනිසුරු මඩුල්ල ඉදිරියේ කැඳවනු ලැබුවා.
එම අවස්ථාවේදී මැතිවරණ කොමිසම වෙනුවෙන් පෙනී සිටි ජනාධිපති නීතිඥ සාලිය පීරිස් මහතා අධිකරණය හමුවේ කරුණු දක්වමින් මේ අවස්ථාව වන විට පළාත් පාලන ඡන්ද විමසීම සඳහා තම සේවාදායකයින් විසින් දිනයක් නියම කර නොමැති බව සඳහන් කළා.
භාණ්ඩාගාරය විසින් ඡන්ද විමසීම පැවැත්වීම සඳහා මුදල් නිකුත් කරන අවස්ථාවක හෝ අදාළ ඡන්ද විමසීම පවත්වන ලෙස අධිකරණය විසින් නියෝගයක් නිකුත් කරන අවස්ථාවක හෝ එම අවස්ථා දෙකෙන් කලින් එළඹෙන අවස්ථාවක අදාළ ඡන්ද විමසීම පැවැත්වීම සඳහා දිනයක් නියම කරන බව තේරීම් භාර නිලධාරීන් විසින් ගැසට් නිවේදනයක් නිකුත් කරමින් සදහන් කර තිබෙන බවත් ජනාධිපති නීතිඥ සාලිය පීරිස් මහතා සඳහන් කළා.
අදාළ පෙත්සම විභාග කිරීම සඳහා නොතිසි නිකුත් කිරීම සම්බන්ධයෙන් සාලිය පීරිස් මහතා ඉකුත් නඩු දිනයේදී මූලික විරෝධතා මතු කර තිබුණා.
මුදල් අමාත්යංශ ලේකම්වරයා වෙනුවෙන් පෙනී සිටි අතිරේක සොලිසිටර් ජෙනරාල් නෙරින් පුල්ලේ මහතා අධිකරණය හමුවේ කරුණු දක්වමින් රටේ වත්මන් ආර්ථික තත්ත්වය පිළිබඳ විස්තර ඇතුළත් දිවුරුම් ප්රකාශයක් තම සේවාදායකයා විසින් ශ්රේෂ්ඨාධිකරණය හමුවේ ගොනු කර තිබෙන බව සඳහන් කළා.
කෙසේ වෙතත් පෙත්සම්කාර කර්නල් වරයා වෙනුවෙන් පෙනී සිටි ජනාධිපති නීතිඥ ෆයිස් මුස්තාපා කියා සිටියේ මෙම පෙත්සම ඉදිරි දිනයක කැඳවිම සදහා දින නියම කරන ලෙසයි.
ඒ අනුව පෙත්සම සලකා බැලීම සඳහා සැප්තැම්බර් 04 වනදා කැඳවන ලෙසත් අධිකරණය නියම කළා.
