අබුඩාබි ඉන්ටර්නැෂනල් ලීග් විස්සයි විස්ස තරගාවලියේ තවත් තරගයක් ඊයේ (21) රාත්‍රියේ පැවැත් වුණා.
මෙම තරගය පැවැත් වුණේ අබුඩාබි නයිට් රයිඩර්ස් කණ්ඩායම සහ මුම්බායි ඉන්දියන්ස් එමිරේට්ස් කණ්ඩායම අතරයි.
තියුණු සටනකින් පසු මෙම තරගය අවසන් පන්දුවේ දී ජය ගන්නට මුම්බායි එමිරේට්ස් කණ්ඩායමට හැකියාව ලැබුණා.
මෙම තරගය සඳහා අබුඩාබි නයිට් රයිඩර්ස් කණ්ඩායම වෙනුවෙන් ශ්‍රී ලංකාව ක්‍රීඩකයින් තිදෙනෙක් ම සහභාගී වූ අතර ධනංජය ද සිල්වා, චරිත් අසලංක සහ ළහිරු කුමාර එම ක්‍රීඩකයින් තිදෙනායි.
මෙහිදී පළමුව පන්දුවට පහරදුන් අබුඩාබි නයිට් රයිඩර්ස් කණ්ඩායම නියමිත පන්දුවාර 20 තුළ කඩුලු 07ක් දැවී ලකුණු 170ක ලකුණු පුවරුවක් නිර්මාණය කළ අතර, එහිදී මුල්පෙළ පිතිකරු ධනංජය ද සිල්වා පන්දු 40ක් තුළ වේගවත් ලකුණු 65ක් රැස්කරමින් ඉහළ දායකත්වයක් ලබා දුන්නා.
ඔහු සමඟ අනෙක් අන්තයේ ස්ථාවර වූ චරිත් අසලංක පන්දු 17ක් තුළ 23ක් රැස්කළ අතර, කොදෙව් ක්‍රීඩක සුනිල් නරේන් නොදැවී ලකුණු 28ක් රැස් කිරීමට සමත් වුණා.
පන්දු යැවීමේ දී ෆසාල්හක් ෆාරුකි සහ සහූර් ඛාන් අතරේ කඩුලු 02 බැගින් බෙදී ගියා.
ලකුණු 171ක ජයග්‍රාහී ඉලක්කයක් හඹා ගිය මුම්බායි එමිරේට්ස් කණ්ඩායමට පන්දුවාර 20 අවසානයේ කදුලු 05ක් පමණක් දැවී එම ඉලක්කය පසුකර යෑමට හැකියාව ලැබුණා.
එහිදී ඇන්ඩ්රේ ෆ්ලෙචර් අර්ධ ශතකයක් වාර්තා කළ අතර, නායක කිරන් පොලාඩ් ලකුණු 31ක් සහ නජිබුල්ලා සද්රාන් නොදැවී ලකුණු 35ක් රැස්කරමින් සිය කණ්ඩායම ජයග්‍රහණය කරා රැගෙන ගියා.
නයිට් රයිඩර්ස් පිළ වෙනුවෙන් වේග පන්දු යවන ක්‍රීඩක ළහිරු කුමාර කඩුලු 02ක් බිඳ දැමූ අතර, අකිල් හුසේන්, ඇන්ඩ්රේ රසල් සහ සුනිල් නරේන් අතරේ එක් කඩුල්ල බැගින් බෙදී ගියා.
කෙසේ වෙතත් ධනංජය ද සිල්වාගේ සුපිරි ඉනිම සහ ළහිරු කුමාර දවාගත් කඩුලු 02ක අපතේ යවමින් අවසානයේ මුම්බායි එමිරේට්ස් පිළ තරගයේ ජයග්‍රහණය හිමිකර ගත්තා.
