තමිම් ඉක්බාල් එක්දින පිටියට සමුදීමේ තීරණය ඉල්ලා අස්කර ගනී

එක්දින ක්‍රිකට් පිටියෙන් සමුගන්නා බවට ඊයේ නිවේදනය කළ බංග්ලාදේශ එක්දින ක්‍රිකට් නායක තමිම් ඉක්බාල් සිය තීරණය ඉල්ලා අස්කරගෙන තිබෙනවා.

ඒ බංග්ලාදේශ අගමැතිනි ශීක් හෂීනා මහත්මියගේ මැදිහත් වීම හේතුවෙන්.

අද දහවල් තමිම් ඉක්බාල් සහ අගමැතිවරිය අතර සාකච්ඡාවක් පැවති අතර එහිදී මෙම තීරණය ගෙන තිබෙනවා.

මෙම සාකච්ඡාවට තමිම් ඉක්බාල්, ඔහුගේ බිරිඳ මෙන්ම හිටපු නායක Mashrafe Mortaza මෙන්ම බංග්ලාදේශ ක්‍රිකට් පාලක මණ්ඩලයේ සභාපති Nazmul Hassan ද එක්ව තිබෙනවා.

ක්‍රිකට් මාධ්‍ය වාර්තා ඊයේ (06) සඳහන් කළේ වසර 16ක ජාත්‍යන්තර ක්‍රිකට් දිවියට හදිසියේ තිත තබමින් ඉන්දියාවේදී ආරම්භ වීමට ලෝක කුසලානයට මාස තුනකට පෙර බංග්ලාදේශ එක්දින නායක තමීම් ඉක්බාල් ජාත්‍යන්තර ක්‍රිකට් පිටියෙන් සමු ගැනීම ප්‍රකාශයට පත් කර ඇති බවයි.

මාධ්‍ය හමුවකට එක් වූ තමීම් අතිශයින් හැඟීම්බර වූ අතර කඳුළු සලමින් මෙම නිවේදනය ප්‍රකාශයට පත් කර තිබෙනවා.

ඇෆ්ගනිස්ථානය සමග පැවති පළමු එක්දින තරඟය පරාජයට පත් වී දිනකට පසුවයි තමිම් ඉක්බාල් මෙම තීරණය ගෙන ඇත්තේ.

34 හැවිරිදි තමීම් පසුගිය වසරේ T20 තරගවලින් සමු ගත් අතර ඔහුගේ අවසන් ටෙස්ට් තරගය අප්‍රේල් මාසයේදී අයර්ලන්තයට එරෙහිව පැවැති තරගයයි.

2007 වසරේ පෙබරවාරි මාසයේදී තමීම් ඔහුගේ මංගල ODI තරගයෙන් ජාත්‍යන්තර ක්‍රිකට් දිවිය ආරම්භ කළ අතර බටහිර ඉන්දීය කොදෙව් හි පැවති ලෝක කුසලාන තරඟාවලියේදී ඉන්දියාවට එරෙහිව බංග්ලාදේශ විශිෂ්ට ජයග්‍රහණයේදී අර්ධ ශතකයක් ද රැස් කළා.

ඔහු බංග්ලාදේශය වෙනුවෙන් වැඩිම එක්දින ලකුණු ලාභියා වන අතර (8313) ශතක 14ක් ද තමීම් ගේ වාර්තා අතරට අයත්.

වත්මන් ක්‍රිකට් ක්‍රීඩකයින් අතර විරාත් කෝලි සහ රෝහිත් ෂර්මාට පසුව තුන්වන වැඩිම ලකුණු ලාභියා වන්නේ ද තමිම් ඉක්බාල්.

ටෙස්ට් පිතිකරුවෙකු ලෙස, තමීම් ලකුණු 5134ක් රැස් කර ඇති අතර ඒ තරඟ 70කදී ශතක දහයක් ද සමගින්.