ඩීසල් රැගත් තවත් නෞකාවක් දිවයිනට

ඩීසල් මෙට්‍රික් ටොන් 40,000ක් රැගත් තවත් නෞකාවක් ඊයේ (16) රාත්‍රියේ මෙරටට පැමිණ තිබෙනවා.

ඛනිජ තෙල් නීතිගත සංස්ථාව සඳහන් කළේ අදාළ නෞකාවේ ඉන්ධනවල සාම්පල පරීක්ෂා කිරීම් සඳහා යොමුකර ඇති බවයි.

සාම්පල පරීක්ෂාවෙන් අනතුරුව නෞකාවේ ඉන්ධන අද (17) පස්වරුවේ ගොඩබෑමට නියමිතව තිබෙනවා.

මේ අතර ඩීසල් මෙට්‍රික් ටොන් 41,000ක් රැගත් නෞකාවක් ඊයේ අලුයම මෙරටට පැමිණියා.

තවත් ඩීසල් මෙට්‍රික් ටොන් 40,000ක් රැගත් නෞකාවක් සහ පෙට්‍රල් මෙට්‍රික් ටොන් 35,000ක් රැගත් නෞකාවක් හෙට (18) සහ අනිද්දා (19) යන දින දෙක තුළ දිවයිනට පැමිණීමට නියමිතව තිබෙනවා.

මේ අතර ඉන්ධන නෞකා දිවයිනට පැමිණියත් ජාතික ඉන්ධන බලපත් ක්‍රමවේදය ක්‍රියාත්මක කරන තෙක් සිපෙට්කෝ පිරවුම්හල් අසල පෝලිම්වල රැදී සිටීමෙන් වළකින ලෙස බලශක්ති අමාත්‍යවරයා ඉල්ලීමක් කළා.

කෙසේ වෙතත් මේ වනවිටත් ඉන්ධන පැමිණෙතැයි අපේක්ෂාවෙන් පුද්ගලයින් සිපෙට්කෝ පිරවුම්හල් අසල දිගු පෝලිම්වල රැඳී සිටිනවා.