අධිකරණයෙන් කළ නියෝගය අනුව පාස්කු ප්‍රහාරයේ වින්දිතයන්ට රුපියල් කෝටි 10ක මුදලක් ලබාදීමට තමන්ට වත්කමක් නොමැති බව හිටපු ජනාධිපති මෛත්‍රීපාල සිරිසේන මහතා පවසනවා.
අද පැවති මාධ්‍ය හමුවකට එක්වෙමින් ඔහු කියාසිටියේ තමා දේශපාලනයේ නිරත වෙමින් කිසිදු ආකාරයකින් දූෂණ වංචාවලට සම්බන්ධ වීමක් හෝ මුදල් එක්රැස් කර ගැනීමක් සිදුකර නොමැති බවයි.
තමාගේ බලාපොරොත්තුව රට පුරා සිටින තම පාක්ෂිකයන් ඇතුලු ජනතාවගෙන් කෝටි 10ක මුදල එකතු කර ගැනීම අපේක්ෂාව වන අතර වසර 34ක් පුරා තම දේශපාලන දිවිය තුල සෑම වසරකම වත්කම් බැරකම් ප්‍රකාශ පාර්ලිමේන්තුවට ලබාදී ඇති බවයි මෛත්‍රීපාල සිරිසේන මහතා කියාසිටියේ.
විශ්‍රාමික ජනාධිපතිවරයෙකුට රජයෙන් ලබාදෙන වාහන තුනක් පමණක් තමා සතුව පවතින අතර වෙනත් යතුරුපැදියක් හෝ තමාට නොමැති බවන හිටපු ජනාධිපතිවරයා සඳහන් කරනවා.
ජනාධිපතිවරයා ලෙසට කටයුතු කරන සමයේ සිදුකළ නිල විදෙස් සංචාර ද සිදු කරනු ලැබුවේ ජාත්‍යන්තර සංවිධානවලින් ලැබුණු ටිකට්පත්වලින් බවයි ඔහු කියාසිටියේ.
හිටපු ජනාධිපති මෛත්‍රීපාල සිරිසේන මහතා මෙම මාධ්‍ය හමුව ආරම්භ කරන අවස්ථාවේ විදුලිය විසන්ධි වීමක් ද සිදුවූ අතර ඔහු මාධ්‍ය හමුව පවත්වනු ලැබුවේ දුරකථන සහ ඊට පෙර විදුලි ආරෝපණය කර තිබූ විදුලි බල්බ යොදා ගනිමිනුයි.
