සිංගප්පූරුවේ වෙසෙන ඉන්දීය ප්‍රජාව සහ සංක්‍රමණික සේවකයන් ඉලක්ක කරගනිමින්, සමාජය තුළ ජාතිවාදී නොසන්සුන්තාවයක් ඇති කිරීමේ අරමුණින් අන්තර්ජාලයට මුදා හැර තිබූ සමාජ මාධ්‍ය සටහන් සහ ගිණුම් රැසක් වහාම ක්‍රියාත්මක වන පරිදි අවහිර කිරීමට සිංගප්පූරු රජය පියවර ගෙන ඇති බව ‘ස්ට්‍රේට්ස් ටයිම්ස්’ (The Straits Times) පුවත්පත වාර්තා කරනවා.
සිංගප්පූරු ස්වදේශ කටයුතු අමාත්‍යාංශය ප්‍රකාශ කළේ, “විදේශීය මැදිහත්වීම් වැළැක්වීමේ පනත” යටතේ මෙම දැඩි පියවර ගත් බවයි. විමර්ශනවලදී හෙළි වී ඇත්තේ මෙම වෛරී සහගත සහ වැරදි තොරතුරු ඇතුළත් සටහන්, චීනය පදනම් කරගත් සන්නිවේදන ජාලයන් සහ වෙබ් අඩවි උපයෝගී කරගනිමින් සංවිධානාත්මක කණ්ඩායමක් විසින් පතුරුවා හැර ඇති බවයි.
සිංගප්පූරුවේ විවිධ ජාතීන් අතර පවතින සමාජයීය සමගිය සහ ස්ථාවරත්වය බිඳදැමීම මෙම අසත්‍ය ප්‍රචාරයන්හි ප්‍රධාන අරමුණ වී තිබෙනවා.
මීට පෙරද විවිධ රටවල් සිංගප්පූරුවේ අභ්‍යන්තර දේශපාලනයට සහ ජනවාර්ගික සබඳතාවලට බලපෑම් කිරීමට අන්තර්ජාලය භාවිත කර ඇති අතර, එවැනි ක්‍රියාවලට එරෙහිව කිසිදු තරාතිරමකින් තොරව දැඩි නීතිමය පියවර ගන්නා බව සිංගප්පූරු බලධාරීහු යළිත් අවධාරණය කරනවා.
