සිව්මස් ගැබිණියක සහ ඇගේ සැමියාට පහර දුන් පිය පුතු දෙපළක් ඇතුළු සැකකරුවන් තිදෙනෙකු ලබන 28 වනදා දක්වා රක්ෂිත බන්ධනාගාර ගතකරන ලෙස ගම්පහ වැඩ බලන මහේස්ත්‍රාත් වසන්තා ගුණසේකර ඊයේ (19) නියෝග කළා.
පසුගිය 17 වනදා ගනේමුල්ල, පරගහලන්ද ජනපදය ප්‍රදේශයේ නිවසක පැවති උපන්දින සාදයක් අතර තුර මෙම පහරදීම සිදුකර ඇති බවයි වාර්තා වුණේ.
ඇති වූ කතා බහක් දුරදිග යාමෙන් සැකකරුවන් තිදෙනා විසින් ගැබිණි කාන්තාවගේ සැමියාට පහර දී ඇති අතර, තම සැමියාට පහරදෙන අවස්ථාවේ දී එය වැළක්වීමට ගිය ගැබිණි බිරිඳට ද ඔවුන් විසින් පරහ දී ඇති බවයි අනාවරණය වී ඇත්තේ.
පහරකෑමට ලක්වීමෙන් අනතුරුව 31 හැවිරිදි සිව්මස් ගැබිණිය ප්‍රතිකාර සඳහා බොරැල්ල ද සොයිසා කාන්තා රෝහලට ඇතුළත් කර ඇති බවයි වාර්තා වන්නේ.
සැකකරුවන් තිදෙනා ගනේමුල්ල පොලිසිය විසින් අත්අඩංගුවට ගැනීමෙන් අනතුරුවයි අධිකරණය හමුවට ඉදිරිපත් කරනු ලැබුවේ.
ගනේමුල්ල, අමුණුගොඩ ප්‍රදේශයේ පදිංචිකරුවන් වන විතානගේ නිව්ටන් පෙරේරා, විතානගේ රොෂාන් ප්‍රියදර්ශන යන පිය පුතු දෙපළ සහ බලගල, නාරංඕවිට ප්‍රදේශයේ පදිංචිකරුවෙකු වන තිත්තගාල්ල ගමගේ විකුම් සන්දීප යන පුද්ගලයා සිද්ධිය සම්බන්ධයෙන් මෙලෙස රක්ෂිත බන්ධනාගාර ගතකර තිබෙනවා.
